---
रेल्वेखाली आत्महत्या
नाशिक रोड : ओढा रेल्वे स्थानकादरम्यान जळगावकडे जाणाऱ्या रेल्वेमार्गावरील पोल क्रमांक १९१/०७ येथे रविवारी रात्री आठ वाजेच्या सुमारास अनोळखी इसमाने रेल्वेसमोर येत आत्महत्या केली. आत्महत्या केलेल्या इसमाची ओळख पटलेली नसून याप्रकरणी नाशिक रोड पोलीस ठाण्यात अकस्मात मृत्यूची नोंद करण्यात आली आहे.
----
‘पीपल्स’च्या शहराध्यक्षाविरुद्ध गुन्हा
नाशिक रोड : जेल रोड येथील राजराजेश्वरी मंगल कार्यालयात पीपल्स रिपाइंची राज्यस्तरीय पदाधिकाऱ्यांची बैठक आयोजित केल्याप्रकरणी पीपल्स यूथच्या शहराध्यक्षाविरुद्ध गुन्हा दाखल करण्यात आला आहे. शनिवारी दुपारी पीपल्स रिपाइं राज्य पदाधिकाऱ्यांची बैठक व नूतन प्रदेशाध्यक्षपदी गणेश उन्हवणे यांची निवड झाल्याबाबत सत्काराचा कार्यक्रम आयोजित करण्यात आला होता. शहरात जमावबंदीचा आदेश असताना तो भंग केला, सार्वजनिक ठिकाणी कार्यक्रमास बंदी असताना त्याचा भंग करून कोरोना संसर्गजन्य आजार पसरविण्याची कृती केली म्हणून याप्रकरणी पीपल्स यूथ फोरमचे शहराध्यक्ष संशयित नीलेश उन्हवणे यांच्याविरुद्ध नाशिक रोड पोलीस ठाण्यात गुन्हा दाखल करण्यात आला आहे.
---
आगरटाकळीत युवकावर शस्त्राने वार
नाशिक रोड : आगरटाकळीतील डॉ. बाबासाहेब आंबेडकर हॉलसमोर जुन्या भांडणाची कुरापत काढत युवकाला शिवीगाळ करून मारहाण करत धारदार हत्याराने वार करून जखमी केल्याची घटना घडली आहे.
आगरटाकळी, सोनवणेबाबा चौक येथील अमोल अच्युतराव पाईकराव याने दिलेल्या फिर्यादीत म्हटले आहे की, शुक्रवारी रात्री दहाच्या सुमारास आंबेडकर हॉलसमोर गवारे यांच्या हळदीच्या कार्यक्रमासाठी तो उभा होतो. संशयित ओंकार सूर्यवंशी (वैदूवाडी, टाकळी) याने चार महिन्यांपूर्वी झालेल्या भांडणाची कुरापत काढून अमोलला शिवीगाळ करून मारहाण केली. धारदार हत्याराने हाताच्या दंडावर वार करून जखमी केले. याप्रकरणी उपनगर पोलीस ठाण्यात मारामारीचा गुन्हा दाखल करण्यात आला आहे.
---
गांजा सेवनाने दोघांना अटक
नाशिक रोड : विहीतगाव स्मशानभूमी शेडमध्ये गांजा पिणाऱ्या दोन युवकांविरुद्ध गुन्हा दाखल करण्यात आला आहे.
विहीतगाव स्मशानभूमी शेडमध्ये शनिवारी रात्री आठच्या सुमारास उपनगर पोलिसांना बाळा ऊर्फ प्रवीण मच्छिंद्र डोके (३१, कोठुळे चाळ, गुरकृपालान्स, वडने रोड) आणि विशाल अमर सावंत (३५, साठेनगर, देवळालीगाव) हे दोघे रोजीला पेपरमध्ये गांजा हा अमली पदार्थ भरून सेवन करत असल्याचे समजले. पोलिसांनी दोघांना ताब्यात घेऊन उपनगर पोलीस ठाण्यात गुन्हा दाखल करण्यात आला आहे.