पंचवटी : पेठकडून नाशिककडे येणाऱ्या ट्रकचालकाला रस्त्यातील झाडाचा अंदाज न आल्याने मालट्रक झाडावर आदळल्याची घटना शुक्रवारी पहाटे साडेपाच वाजेला एसटी बस वर्कशॉपसमोर घडली आहे. या अपघातात चालक आणि क्लिनर असे दोघेजण जखमी झाले असून, त्यांना उपचारासाठी शासकीय रुग्णालयात दाखल करण्यात आले आहे. याबाबत म्हसरूळ पोलीस ठाण्यात अपघाताचा गुन्हा दाखल करण्यात आला आहे. कर्नाटक येथील मालट्रक (क्र. के. ए. ३९ -६३९०) पहाटेच्या सुमाराला पेठकडून नाशिककडे येत असताना पेठरोडवरील एसटी बस वर्कशॉपसमोर असलेल्या रस्त्यातील आंब्याच्या झाडाचा अंदाज न आल्याने मालट्रक झाडावर जाऊन धडकला. या अपघातानंतर चालक गोपीचंद विठ्ठल मोदगड, दत्तात्रय रावणआप्पा आंगडा (दोघे रा. कर्नाटक) हे अपघातग्रस्त मालट्रकमध्ये अडकले होते. (वार्ताहर)
ट्रक झाडावर आदळून दोन जखमी
By admin | Updated: February 10, 2017 23:54 IST