वावीजवळ कंटेनरच्या अपघातात दोघे ठार

वावीजवळ कंटेनरच्या अपघातात दोघे ठार

वावी : रस्त्याने जाणाऱ्या कंटेनरवर पाठीमागून येणाऱ्या महिंद्रा कारने धडक दिल्याने झालेल्या अपघातात अहमदाबाद येथील दोघेजण जागीच ठार झाले तर दोनजण जखमी झाले आहेत. सिन्नर-शिर्डी रस्त्यावर गुरुवारी रात्री १० वाजेच्या सुमारास मीरगाव फाट्याजवळ सदर अपघात झाला. सिन्नरकडून शिर्डीच्या दिशेने कंटेनर (क्र. एम. एच. ०४ इ. एल. २६७९) जात असतांना पाठीमागून भरधाव वेगाने येणारी महिंद्र कार (क्र. जी. जे. ०१ आर. जी. ८६८१) त्यावर जावून आदळली. या अपघातात अहमदाबाद (गुजरात) येथील मिलन चैतन्यप्रसाद पंचोळी (५०) व अजय भालचंद्र पंचाळ (४९) हे जागी ठार झाले. तर आशितोष महेशभाई जोशी व विघ्नेश देवीप्रसाद चौखरी हे गंभीर जखमी झाले. अपघाताची खबर मिळाल्यानंतर वावी पोलिसांनी घटनास्थळी धाव घेतली. जखमींना तातडीने सिन्नरच्या खासगी रुग्णालयात उपचारासाठी दाखल करण्यात आले. अपघातानंतर कार कंटेनरच्या खाली अडकली होती. पोलीस व नागरिकांनी क्रेनच्या मदतीने अडकलेली कार बाहेर काढली. गुजरात राज्यातील भाविक शिर्डीला दर्शनासाठी जात असतांना सदर अपघात झाला. याप्रकरणी वावी पोलीस ठाण्यात अपघाताची नोंद करण्यात आली आहे. सहाय्यक पोलीस निरीक्षक हेमंत पाटील यांच्या मार्गदर्शनाखाली हवालदार शिवाजी माळी अधिक तपास करीत आहेत. (वार्ताहर)