जवानांनी पाच मिनिटांत गाठले झाकीर हुसेन रुग्णालय

नाशिक : मनपाच्या डॉक्टर झाकीर हुसेन रुग्णालयात मागील महिन्यात घडलेल्या ऑक्सिजन गळतीच्या घटनेने २४ रुग्णांचा बळी घेतला. या दुर्घटनेने संपूर्ण देश हळहळला. यावेळी सर्वप्रथम मदतीची हाक अग्निशमन दलाच्या कानी आली. मुख्यालयाचा दूरध्वनी खणखणला अन जवानांनी सज्ज होत अवघ्या ५ मिनिटांत रुग्णालय गाठले.

झाकीर हुसेन रुग्णालयाबाहेर असलेल्या ऑक्सिजन टाकीतून मोठ्या प्रमाणात गळती होत असल्याने सर्वत्र पांढरा धूर आणि अति थंडावा पसरलेला होता. नागरिकदेखील भीतीपोटी लांब पळत होते आणि टाकीभोवती ऑक्सिजनचा भरणा करण्यासाठी आलेला टँकर उभा होता. सर्वप्रथम आपत्कालीन मदत देण्यासाठी पोहोचलेल्या जवानांना डोळ्यासमोर यावेळी केवळ धूर दिसत होता. दृश्यमानता संपूर्णपणे नष्ट झाली होती. याप्रसंगी घटनास्थळी पोहोचलेले अग्निशमन विभागप्रमुख संजय बैरागी, फायरमन उदय शिर्के, ज्ञानेश्वर दराडे, तौसिफ शेख, सोमनाथ थोरात, शरद डेटके यांनी प्रारंभी कमी व्यासाच्या पाईपच्या मदतीने धुरावर पाण्याची फवारणी करण्यास सुरुवात केली. मात्र, काही केल्या धूर कमी होत नव्हता. त्यामुळे समोर काहीच दिसत नव्हते.

--

----इन्फो----

जीवघेण्या धुरात धाडसाने शिरकाव

ऑक्सिजन टाकीच्याभोवती पसरलेल्या अतिथंड वातावरणात बैरागी आणि शिर्के यांनी ''बी.ए.'' सेट लावून या अति थंड अशा पांढऱ्या धुरात धाडसाने प्रवेश केला. ऑक्सिजन टाकीच्या व्हॉल्वभोवती लावलेले ''सेफ्टी किट'' तोडून टाकीचा व्हॉल्व बंद करण्याचे पाहिले लक्ष्य जवानांपुढे होते. त्यानुसार बैरागी यांनी शिर्के यांच्या मदतीने प्लास्टिकचे आवरण तोडून सेफ्टी किट खुली करत सुमारे अर्ध्या तासाच्या शर्थीच्या प्रयत्नांनंतर टाकीचा व्हॉल्व बंद केला आणि होणारी गळती थांबली.

-------

कोट

२७ वर्षांच्या सेवेत पहिल्यांदाच अशा प्रकारच्या दुर्घटनेला सामोरे जावे लागले. अतिथंड वातावरण, पांढरा धूर यामुळे समोर काहीच दिसत नव्हते. आम्ही सगळेच आमच्यापरीने प्रयत्न करत होतो. बी. ए. सेटच्या मदतीने आमचे अधिकारी धुरातही गेले. पाण्याच्या फवारणीमुळे ऑक्सिजनचे रूपांतर पाण्यात होण्यास मदत झाली. ही दुर्घटना काळजाचा थरकाप उडवणारी होती.

- ज्ञानेश्वर दराडे, फायरमन

----

मोठ्या संयमाने बैरागी साहेबांच्या मार्गदर्शनाखाली आम्ही दुर्घटनेची परिस्थिती हाताळत होतो. पाण्याचा मारा करूनही फारसा फरक पडत नव्हता. दृश्यमानता कमीच होती आणि ऑक्सिजन गळती थांबविणे हे आमचे टार्गेट होते. त्यामुळे बैरागी साहेबांनी बी. ए. सेट लावून टाकीच्या दिशेने जाण्याचे आदेश दिले. काही मिनिटांत मी आणि त्यांनी बी. ए. सेट परिधान करून आता प्रवेश केला. सर्वप्रथम आम्ही टाकीचा व्हॉल्व शोधून काढला. यावेळी त्यावर सुरक्षिततेच्या कारणास्तव सेफ्टी किट लावण्यात आलेली होती. हे किट आम्ही तोडण्याचा प्रयत्न करत होतो आणि त्यात अखेर यश आले.

- उदय शिर्के, फायरमन

-

फायरमन फोटो nsk वर पाठविले आहे.