याबाबत सूत्रांनी दिलेल्या माहितीनुसार, शनिवारी (दि. १ मे) पहाटेच्या सुमारास जया लक्ष्मण भुजबळ (५०) यांना श्वास घेण्यासाठी त्रास होत असल्यामुळे नाशिक रोड येथील बिटको कोविड सेंटरला भरती करण्यात आले होते; परंतु ऑक्सिजन बेड न मिळाल्यामुळे त्यांचा मृत्यू झाल्याचे त्यांची मुलगी शिवानी हीस कळताच तिने रुग्णालय आवारातच सकाळच्या सुमारास अर्ध्या लिटर सॅनिटायझरची बाटली रिती करत त्याचे सेवन केले तसेच धारदार शस्त्राने दोन्ही मनगटावर वार करून घेतल्याचे पोलिसांनी सांगितले. त्यामुळे ती गंभीर जखमी झाल्याने अधिक उपचारासाठी शिवानीला गंभीर अवस्थेत जिल्हा शासकीय रुग्णालयात दाखल करण्यात आले होते. त्यानंतर तिच्या नातेवाईकांनी प्रकृती खालावल्यामुळे तिला खासगी रुग्णालयात हलविले. उपचारादरम्यान सोमवारी (दि.३) दुपारी तिला डॉक्टरांनी तपासून मृत घोषित केले. याप्रकरणी नाशिक रोड पोलीस ठाण्यात गुन्हा दाखल करण्यात आला आहे. दरम्यान, तिच्या मृत्यूचे अधिकृत कारण समजू शकले नसले तरी आईच्या मृत्यूने व्यथित होऊन तिने हे टोकाचे पाऊल उचलल्याची चर्चा आहे.
इन्फो
विलगीकरण कक्षाची मागणी
उपचारासाठी गावातील रुग्णांना बाहेरगावी धाव घ्यावी लागत आहे. आतापर्यंत गावात कोरोनाने सहा बळी घेतले आहेत. त्यामुळे नागरिकांमध्ये भीतीचे वातावरण आहे. गावातच विलगीकरण कक्ष उभारण्यासाठी प्रयत्न सुरू होते; परंतु ग्रामपंचायतीकडून प्रशासनावर जबाबदारी झटकली जात असल्याने नागरिकांत संतापाचे वातावरण आहे. गावामध्ये ग्रामसेवकही नसून अतिरिक्त कार्यभार शेजारील गावाच्या ग्रामसेवकांकडे देण्यात आलेला आहे. त्यामुळे गावात कायमस्वरूपी ग्रामसेवक नियुक्त करावा, तसेच गावातच विलगीकरण कक्ष तयार करून उपचार सुविधा उपलब्ध करून द्याव्यात, अशीही मागणी ग्रामस्थांकडून होत आहे.