शहरातून जाणारे मुख्य महामार्ग आणि लहान-मोठे असे सुमारे अठरा ते वीस रस्ते द्वारका चौकात एकत्र येतात. यामुळे हा चौक वाहतुकीच्या दृष्टीने अत्यंत संवेदनशील असल्याचे मानले जाते. या चौकात वाहतुकीला अडथळा झाल्यास त्याचा प्रभाव शहरातील अन्य सर्व रस्त्यांवरील वाहतुकीवर झालेला पाहावयास मिळतो. गुरुवारी दुपारी तीन वाजेपर्यंत असेच काहीसे चित्र शहरात पाहावयास मिळाले. पहाटे द्वारका चौकात एका बाजूला उलटलेला गॅस टँकर पडून होता, तर दुपारी याच चौकात दुसऱ्या बाजूला रास्ता रोको आंदोलनही करण्यात आले. यावेळी पोलीस आंदोलनकर्ते मोठ्या संख्येने येथे जमले. यामुळे वाहतूक वळविण्यात आली होती. या दोन्ही कारणांमुळे द्वारकेकडे मुंबई-आग्रा महामार्गावरून दाेन्ही बाजूंनी येणारी वाहतूक तसेच पुणे महामार्गावरील वाहतुकीसह शालिमार-सारडा सर्कलकडून येणारी वाहतूक बंद करण्यात आली होती.
मुंबई-आग्रा महामार्गावरील वाहतूक जुना आडगाव नाक्यावरून तपोवनमार्गे पर्यायी रस्त्याने वळविण्यात आली होती. तसेच पुणे महामार्गावरील वाहतूक काठेगल्ली सिग्नलमार्गे भाभानगरमधून वळविण्यात आली होती. शालिमारकडून येणारी वाहतूक सारडा सर्कल येथे रोखण्यात येऊन कौटघाट मौलाना आझाद रोडमार्गे व चौकमंडईमार्गे वळविण्यात आली होती. यामुळे या भागातील अंतर्गत रस्त्यांवर वाहतुकीचा ताण निर्माण झाला. दुपारी दीड वाजेच्या सुमारास मुंबई नाका चौकासह वडाळा नाका, सारडा सर्कल या भागात वाहतुकीचे तीनतेरा झाले. संपूर्ण सर्कलभोवती वाहनांच्या रांगा लागल्या होत्या. वाहतूक कोंडी सोडविताना शहर वाहतूक पोलिसांची दमछाक झाली.
---इन्फो---
जुना आग्रा रोडवरही वाहतूक विस्कळीत
मुंबई नाका सर्कलवर वाहतूक कोंडी झाल्यामुळे भाभानगर रस्ता, कालिका मंदिराकडे जाणारा जुना मुंबई-आग्रा महामार्ग, तिडके कॉलनीत जाणारा अहल्यादेवी मार्गावरील वाहतूक विस्कळीत झाल्याचे चित्र होते. महामार्ग बसस्थानकापासून पुढे थेट कालिका मंदिरापर्यंत वाहनांच्या रांगा लागल्या होत्या.
---इन्फो---
जुन्या नाशकात वाहतूक कोंडी
सारडा सर्कल येथे द्वारकेवर येणारी वाहतूक बंद करण्यात आल्यामुळे वाहनचालकांनी जुने नाशिकमार्गे जाणे पसंत केले. फाळके रोड, चौकमंडईच्या अंतर्गत रस्त्यांचा पर्याय निवडून अमरधाम रोडने बाहेर पडण्याचा प्रयत्नात असलेल्या वाहनचालकांमुळे जुन्या नाशकातील बागवानपुरा, महात्मा फुले चौक, अमरधाम रोडवर वाहतूक कोंडी झाली होती. हे रस्ते अरुंद असल्याने मोठा ताण निर्माण झाला होता.