नाशिक : शहरात सकाळी सात ते दुपारी तीन वाजेपर्यंतच दुकाने खुली ठेवण्याची परवानगी असल्याने यावेळेत पेठ रोडवर भाजी विक्रेते रस्त्यालगत दुकाने लावत असल्याने या भागात वाहतुकीला अडथळा निर्माण होत आहे. तसेच भाजी खरेदीसाठी येणाऱ्या ग्राहकांची मोठ्या प्रमाणात गर्दी होत आहे.
जुन्या वाहनांनी व्यापला रस्ता
नाशिक : द्वारका ते मुंबई नाका परिसरात जुन्या वाहनांची देखभाल व दुरुस्ती करणाऱ्या व्यावसायिकांची दुकाने आहेत. या दुकानासमोर मोठ्या प्रमानात जुनाट वाहने उभी असतात. या वाहनांनी रस्ता व्यापला जात असल्याने परिसरातून येणाऱ्या जाणाऱ्या वाहनांची अडचण होत असल्याने वाहन चालकांकडून नाराजी व्यक्त होत आहे.
रविशंकर मार्गावर दुर्गंधीचे साम्राज्य
नाशिक : डीजीपीनगर परिसरातील श्रीश्री रविशंकर मार्गालगत असलेल्या नाल्याची नियमित सफाई होत नसल्याने या भागात मोठ्या प्रमाणात दुर्गंधीचे साम्राज्य पसरले आहे. या भागातील नाल्यांची महापालिकेच्या सफाई विभागाने नियमित सफाई करण्याची मागणी परिसरातील नागरिकांकडून होत आहे.
नाशिक -त्र्यंबक रोडवर बोगनवेलीचा अडसर
नाशिक : जिल्हा रुग्णालयामोरील नाशिक- त्र्यंबक रोडवरील दुभाजकावर बोगन वेल वाढण्याने वाहतुकीला अडसर निर्माण होत आहे. अनेकदा दुचाकी चालकांना बोगन वेल लागून दुखापत होत असल्याने बोगनवेलीची छाटणी करण्याची मागणी होत आहे.
बाजार समिती आवारात मास्कविना वावर
नाशिक : नाशिक कृषी उत्पन्न बाजार समिती आवारात अनेक जण मास्कविना वावरत असल्याने कोरोनाचा संसर्ग पसरण्याची भीती व्यक्त होत आहे. या ठिकाणी जिल्हाभरातून येणाऱ्या शेतकऱ्यांच्या सुरक्षिततेसाठी काटेकोरपणे मास्क सक्तीची अंमलबजावणी करण्याची मागणी होत आहे.
अधिकृत फलकांनी शहराचे विद्रुपीकरण
नाशिक : शहरात विविध ठिकाणी अनधिकृत जाहिरातीचे फलक लावून विद्रुपीकरण केले जात आहे. स्मार्ट रोडवरही अशा प्रकारे पोस्टर, भित्तिपत्रके लावून विद्रुपीकरण होत असल्याने अशा अनधिकृत फलक, पोस्टरवर कारवाई करण्याची मागणी होत आहे.