पिंपळगाव येथे व्यापाऱ्याचा आत्महत्त्येचा प्रयत्न

पिंपळगाव येथे व्यापाऱ्याचा आत्महत्त्येचा प्रयत्न

पिंपळगाव बसवंत : येथील द्राक्ष व्यापारी मोहम्मद नाजीम राईन (४२) या व्यापाऱ्याने विषारी औषध सेवन करून आत्महत्त्या करण्याचा प्रयत्न केला आहे.मोहम्मद नाजीम हे व्यापारी गेल्या ८५ वर्षांपासून पिंपळगाव क्षेत्रात द्राक्ष, टमाटा, बेदाणा आदीचा व्यवसाय करत असून हाडके नगर येथे स्वत:च्या बंगल्यात ४ मुल व पत्नीसह राहत आहेत. दि. ९ रोजी स्थानिक पिंपळगावातील शेतकऱ्यांनी रात्रीच्यावेळी रिलायन्स पंपामागे बेदानाकरण्याच्या शेडवर जाऊन बाकी असलेले पैसे देण्याचा तगादा लावला. सदर व्यापाऱ्याने शेतकऱ्यांचे पावसाने नुकसान झालेले द्राक्षबाग बेदाना करण्यासाठी घेतला होता. शेतकऱ्यांचे २० ते २२ लाख रुपये देणे बाकी होते. मात्र सदर व्यापाऱ्याचे ३० टन बेदाना हा कोल्ड स्टोअर्सला ठेवला होता. ते विक्री करून शेतकरी देणे होते. सल्फर जातीच्या बेदाण्याला सध्या १०० ते १०८ रुपयांपर्यंत बाजार भाव असून, पुढील आठवड्यात माल विक्री होणार होता. यात शेतकरीवर्ग कुठल्याही सबबीवर ऐकण्याच्या मनस्थितीत नव्हते. स्थानिक शेतकरी असल्याने त्यानी दादागिरी करून बेदाणाशेडमधून १५ टन माल उचलून नेला व सदर व्यापाऱ्यास जिवे मारण्याची धमकी दिली. तसेच बेदाणाशेडचेही नुकसान केले. २५ वर्षांत सदर व्यापारी व्यवस्थित राहिला असून आलेले संकट सहन न झाल्याने अखेरे विषारी औषध सेवन करून स्वत:ची जीवनयात्रा संपविण्याचा प्रयत्न केला. याबाबत पत्नी रोजवानो बानो यांनी पोलीस स्टेशनला दोन दिवस चकरा मारून गुन्हा नोंद करण्याबाबत विनंती केली; मात्र पोलिसांनीही सदर महिलेची कुठलीही दखल घेतली नाही. दरम्यान, ग्रामीण पोलीस अधीक्षकांशी दूरध्वनीवरून संपर्क करून माहिती दिल्यावर स्थानिक पोलीस चौकशी करून गेले.पण सदर महिलेची अद्यापपर्यंत तरी तक्रार नोंदवून गेतली नाही. (वार्ताहर)