----
दुचाकी दुभाजकावर धडकून तरूण ठार
मालेगाव : मुंबई - आग्रा महामार्गावर झोडगे शिवारात दुचाकी दुभाजकावर धडकून झालेल्या अपघातात शाहीद सिराजुद्दीन शेख याचा मृत्यू झाला आहे. या प्रकरणी शेख सिराज शेख अलीमुद्दीन यांनी तालुका पोलीस ठाण्यात फिर्याद दिली आहे. शाहीद हा दुचाकी क्रमांक एमएच ४१ एसी ०२४० ही मालेगावकडून झोडगेकडे जात असताना दुभाजकावर धडकला. यावेळी त्याला गंभीर दुखापत झाली. धुळे येथील रूग्णालयात उपचार घेत असताना त्याचा मृत्यू झाला. पुढील तपास हवालदार बच्छाव करीत आहेत.
----
महिलेचा छळ करणाऱ्या पाच जणांविरुद्ध गुन्हा
मालेगाव : वाहन घेण्यासाठी माहेरून दोन लाख रूपये आणावेत म्हणून विवाहितेचा मानसिक व शारीरिक छळ करणाऱ्या पतीसह चौघा जणांविरुद्ध कॅम्प पोलीस ठाण्यात गुन्हा दाखल करण्यात आला आहे. या प्रकरणी अनिता गोविंद जाधव रा. खडकी या महिलेने फिर्याद दिली आहे. माहेरून पैसे आणावेत म्हणून पती गोविंद नानाजी जाधव व इतर चौघा जणांनी शारीरिक व मानसिक छळ केल्याचे फिर्यादीत म्हटले आहे. पुढील तपास हवालदार सोनवणे करीत आहेत.
----
सोयगाव नववसाहत भागात घरफोडी
मालेगाव : सोयगाव नववसाहत भागात घराचे कुलूप तोडून अज्ञात चोरट्याने दहा हजार रूपयांची रोकड चोरून नेली आहे. या प्रकरणी उमेश प्रकाश मोरे यांनी कॅम्प पोलीस ठाण्यात फिर्याद दिली आहे. अज्ञात चोरट्यांनी कुलूप तोडून घरफोडी करुन रोकड चोरून नेली आहे. पुढील तपास हवालदार डिंगर हे करीत आहेत.
----
किदवाई रोडवरुन दुचाकी लंपास
मालेगाव : शहरातील भारत बाजाराच्या प्रवेशद्वारावर उभी केलेली दुचाकी अज्ञात चोरट्याने चोरून नेली आहे. या प्रकरणी करण रवी अग्रवाल यांनी शहर पोलीस ठाण्यात फिर्याद दिली आहे. त्यांच्या मालकीची दुचाकी क्रमांक एमएच ४१ एपी २५९९ ही अज्ञात चोरट्यांनी चोरून नेली आहे. पुढील तपास एस. बी. पाटील हे करीत आहेत.
----
अत्याचार करणाऱ्याविरुद्ध गुन्हा दाखल
मालेगाव : तालुक्यातील रावळगाव येथील अल्पवयीन मुलीवर अत्याचार करणाऱ्या दीपक संतोष सोनवणे याचेविरुद्ध वडनेर खाकुर्डी पोलीस ठाण्यात गुन्हा दाखल करण्यात आला आहे. या प्रकरणी पीडित मुलीच्या आईने फिर्याद दिली आहे. त्यांच्या १३ वर्षाच्या अल्पवयीन मुलीवर सोनवणे यांनी अत्याचार केल्याचे फिर्यादीत म्हटले आहे. पुढील तपास पोलीस उपनिरीक्षक राजपूत हे करीत आहेत.