-----
कामगाराचा इमारतीवरून कोसळून मृत्यू
नाशिक : सेंट्रिंगचे काम करताना इमारतीवरून कोसळल्याने रामकिशोर बेनीमाधव यादव (३४, रा. हिरावाडी) या कामगाराचा दुर्दैवी मृत्यू झाला. हिरावाडी परिसरातील गोकुळधाम सोसायटीचे काम करताना यादव यांचा तोल जाऊन उंचावरुन ते खाली पडले. त्यात गंभीर मार लागल्याने, त्यांना रुग्णालयात दाखल केले. मात्र, उपचारादरम्यान त्यांचा मृत्यू झाला. या प्रकरणी पंचवटी पोलीस ठाण्यात आकस्मिक मृत्यूची नोंद करण्यात आली आहे.
----
रेल्वेच्या धडकेत युवक ठार
नाशिक : लहवित शिवारातील रेल्वे रूळ ओलांडत असताना, रेल्वेच्या धडकेत एका ३१वर्षीय अज्ञात व्यक्तीचा मृत्यू झाल्याची घटना घडली. रात्री सव्वाआठच्या सुमारास हा युवक रेल्वे रुळावर अचानकपणे पडला. त्याच वेळी रेल्वे आल्याने त्या खाली सापडून तो गंभीर जखमी होऊन मृत्युमुखी पडला. उपस्टेशन प्रबंधक आदित्य कुमार यांनी या प्रकरणी पोलिसांना माहिती दिली. या प्रकरणी देवळाली कॅम्प पोलीस ठाण्यात अकस्मात मृत्यूची नोंद करण्यात आली आहे.
---
चोरट्यांनी तीन दुचाकी लांबविल्या
नाशिक : शहर व परिसरातून दुचाकी चोरी करण्याचे सत्र सर्रासपणे सुरूच आहे. पंचवटी, गंगापूर, म्हसरूळ पोलीस ठाणे हद्दीतून प्रत्येकी एक याप्रमाणे तीन दुचाकी अज्ञात चोरट्यांनी लांबविल्या. या प्रकरणी सागर विलास शिरसाठ यांनी म्हसरूळ पोलीस ठाण्यात तक्रार दिली आहे. ते राहत असलेल्या स्नेहल सोसायटीच्या आवारातून त्यांची पल्सर दुचाकी (एम.एच१५ जीएस६२२८) अज्ञात चोरट्यांनी पळवून नेली. दुसऱ्या घटनेत दिलीप गणेश वाघ यांची पल्सर दुचाकी (एम.एच१५ ईसी७४८६) अज्ञात चोरट्यांनी मखमलाबाद रोडवरील राजपाल कॉलनीमधून लंपास केली. तिसऱ्या घटनेत थत्तेनगर गंगापूररोड येथील एका मॉलच्या वाहनतळातून चोरट्यांनी फिर्यादी रोहन राजाराम हिरे यांची दुचाकी (एम.एच१५ डीपी९९९३) चोरट्याने पळवून नेली.