नाशिक : शहरात कोरोनाबाधितांचे मोठ्या प्रमाणात मृत्यू होत असल्याने अंत्यसंस्कारासाठी लाकडाचा वापरही मोठ्या प्रमाणात होत आहे. त्या पार्श्वभूमीवर लाकडाचा कमीत कमी वापर व्हावा यासाठी एका कंपनीने नाशिक महापालिकेला तब्बल दहा टन बायोकोल मोफत दिले आहेत.
पंचवटी अमरधाम येथे महापौर सतीश कुलकर्णी तसेच आमदार ॲड. राहुल ढिकले तसेच अन्य नगरसेवकांच्या उपस्थितीत हे बायोकोल महापालिकेला देण्यात आले.
नाशिक शहरातील नाशिक आणि पंचवटी या दोन्ही अमरधाममध्ये कोरोनामुळे मृत्यू झालेल्यांवर विद्युत व डिझेल शवदाहिनीत उपचार केले जात असले तरी पारंपरिक बेडचाही वापर होतो. मृतदेहांवर अंत्यसंस्कार करण्यासाठी लाकडांचा वापर खूप होत आहे. लाकडांसाठी वृक्षतोड केली जाते व पर्यायाने पर्यावरणाचा ऱ्हास होतो म्हणून अंत्यविधीसाठी लागणाऱ्या लाकडाला पर्याय म्हणून स्वामी समर्थ बायोकोल बिकेटस कंपनीने दहा टन बायोकोल दिले. हे बायोकोल बिकेट्स शेंगा टरफल, लाकडी भुसा, मका बिट्टी, झाडांचा पालापाचोळा यापासून तयार करण्यात आले आहे. त्यांची ज्वलन क्षमता ही लाकडापेक्षा जास्त असून जाळल्यानंतर कार्बन डाय ऑक्साईड तयार होत नाही म्हणजेच प्रदूषण होत नाही आणि त्यामुळे त्यांचा वापर अंत्यसंस्काराच्या वेळी करण्यात येणार आहे. या कंपनीचे संचालक सचिन मोहिते, प्रकाश भोये, मधुसुदन वाडे यांनी सामाजिक बांधिलकी या भावनेतून बायाेकोल सुपुर्द केले. या वेळी कंपनीच्या अन्य अधिकाऱ्यांबरोबरच भाजपचे नगरसेवक प्रशांत जाधव, सुनील केदार, शहर सचिव अमित घुगे, धनंजय माने, चंद्रशेखर पंचाक्षरी आदी उपस्थित होते.
छायाचित्र आरफोटोवर २९ बायोकोल नावाने..
अंत्यविधीसाठी लाकडांना पर्याय म्हणून पंचवटी अमरधाम येथे बायोकोल बिकेट्स देण्यात आले. या वेळी उपस्थित महापौर सतीश कुलकर्णी, आ. राहुल ढिकले, गिरीश पालवे, सचिन मोहिते, प्रकाश भोये, प्रशांत जाधव, अमित घुगे, सुनील केदार आदी.