पंचवटी : दिंडोरीरोडवरील म्हसरूळ शिवारात असलेल्या कुलकर्णी फार्मजवळील रस्त्यावर चारचाकी आयशरने प्रवासी वाहतूक करणाऱ्या प्रवासी जीपला समोरून धडक दिल्याने झालेल्या अपघातात जीपचालक ठार झाला. रात्री साडेबारा वाजता हा अपघात घडला. या अपघातात फुलेनगर अवधूतवाडी येथील सलिम उमरखान शेख (४६) हे ठार झाले आहे. याबाबत मिळालेली माहिती, अशी की, फुलेनगर येथील शेख हे काळी पिवळी जीपचालक असून, रात्री ते जीपने (एम एच १५ ई ४८७६) म्हसरूळकडून दिंडोरी नाक्याकडे येत असताना प्रभातनगरपासून पुढे असलेल्या कुलकर्णी फार्मजवळील रस्त्यावर समोरून भरघाव वेगाने आलेल्या आयशर (जीजे ०३ अ‍ेजी १९८२)ने जीपला जबर धडक दिली या धडकेत शेख यांना गंभीर मार लागल्याने ते जखमी झाले. त्यांना जखमी अवस्थेत रुग्णालयात उपचारासाठी नेले असता तेथे त्यांच्यावर उपचार सुरू असताना ते ठार झाले. या अपघाताप्रकरणी पोलिसात गुन्हा दाखल करण्यात आला आहे. (वार्ताहर)
टेम्पोची जीपला धडक; चालक ठार
By admin | Updated: December 25, 2014 01:36 IST