कांद्याने आणले उत्पादकांच्या डोळ्यात पाणी

मागील वर्षाचा कटू अनुभव विसरून यंदा बहुतांश शेतकऱ्यांनी चार ते पाच हजार रुपये प्रतिकिलो असा बियाणांचा दर असतानाही मोठ्या प्रमाणात कांदा लागवड केली. शेतकऱ्यांच्या वाढत्या मागणीमुळे बऱ्याच भागात बियाणांचा तुटवडा जाणवला. शेजारील तालुक्यातून बियाणे आणून शेतकऱ्यांनी कांद्याचा जुगार खेळला. अनेकांची बियाणांमध्ये फसवणूकही झाली. अशा परिस्थितीतही अनेक शेतकऱ्यांनी कांदा पीक जोमात आणण्याचा प्रयत्न केला. वाढती मजुरी व खते, औषधे यांच्या किमतीत झालेली वाढ, ही कांदा पिकाचे उत्पादन खर्च वाढविणारी ठरली. यंदा खरीप हंगामापासूनच हवामानही फारसे अनुकूल नव्हते. डिसेंबरनंतर उन्हाळ कांद्याच्या लागवडीला सुरुवात झाली. या महिन्यात लागवडीचे प्रमाण नगण्य होते. जानेवारी अखेरपर्यंत कांदा लागवड सुरू होती. फेब्रुवारी महिन्यात अनेक बाजार समित्यांमध्ये कांद्याला साडेचार हजार रुपये क्विंटलचा दर मिळाला. हे दर महिन्याच्या सुरुवातीपर्यंत टिकून होते; मात्र अचानक दरात घसरण होण्यास सुरुवात होऊन हजार ते बाराशे रुपये क्विंटलपर्यंत खाली आले. त्यामुळे शेतकऱ्यांचा उत्पादन खर्च वसूल होतो की नाही, अशीच शंका निर्माण व्हायला लागली. महावितरणने ऐन टप्प्यात वीजबिल वसुली सुरू करून शेतकऱ्यांना झटका दिला. त्यातच अवकाळी पाऊस, गारपिटीने तडाखा दिला. त्यामुळे आधीच मेटाकुटीला आलेल्या शेतकऱ्यांना आणखी त्रास सहन करावा लागला. आता पुन्हा कोरोनाने डोके वर काढले असून, लॉकडाऊन करायची वेळ आल्यास शेतकऱ्यांच्या तोंडचे पाणी पळणार आहे.