नाशिक : शरणपूररोड परिसरात वास्तव्यास असलेल्या एका महिलेची परराज्यातील अनोळखी इसमांसोबत मैत्री झाल्यानंतर सदर महिलेचे अपहरण करण्यात आल्याची तक्रार तिच्या पतीने सरकारवाडा पोलीस ठाण्यात दिली आहे. महिलेच्या शोधासाठी महिला पोलिसांचे पथक उत्तराखंडला पोहचले आहे.याबाबत पोलिसांनी दिलेली माहिती अशी की, सदर महिला फेसबुक, व्हॉट्स अॅप या सोशल मीडियाच्या माध्यमातून चॅटिंग करत असे. काही महिन्यांपूर्वीच उत्तराखंडच्या पंचायत जिल्ह्यामधील संशयित देव धोनी आणि नथू भंडारी या युवकांसोबत विवाहितेचा संपर्क आला आणि हळूहळू या तिघांमध्ये संपर्क वाढत गेला. दरम्यान, दोघा संशयितांनी विवाहितेला विविध प्रकारचे आमिष दाखविल्याचे फिर्यादीत म्हटले आहे. सरकारवाडा पोलीस ठाण्यात दोघा संशयितांविरुद्ध अपहरणाचा गुन्हा दाखल करण्यात आला आहे.संशयितांचा माग लागल्याने सरकारवाडा पोलीस ठाण्याचे सहायक पोलीस निरीक्षक व्ही. ए. आहिरराव, पोलीस नाईक शालन सातपुते, गणेश वाघ या तिघा पोलिसांचे पथक उत्तराखंडला पोहचले आहे.
विवाहितेच्या शोधासाठी पथक उत्तराखंडला रवाना
By admin | Updated: August 8, 2016 01:20 IST