दोडी रुग्णालयात शस्त्रक्रिया क्षमता तीनपट वाढणार

जिल्हा शल्य चिकित्सकांकडून पाहणी

नांदूरशिंगोटे : दोडी ग्रामीण रुग्णालयात शस्त्रक्रिया विभागाचा विस्तार करण्यास सुरुवात झाली आहे. त्यामुळे शस्त्रक्रिया क्षमता तीनपट वाढणार असून, या कामाची पाहणी जिल्हा शल्य चिकित्सक डॉ. अशोक थोरात यांनी केली. दरम्यान, शस्त्रक्रियांची व्याप्ती वाढणार असल्याने त्याचा परिसरातील ३० पेक्षा अधिक गावांना फायदा होणार आहे.

परिसर सुधारणा करण्यासह शस्त्रक्रिया विभागाची सज्जता वाढवावी यासाठी काही दिवसांपूर्वी बैठक घेण्यात आली होती. तसेच दोन कोटी रुपयांचा प्रस्तावही सादर करण्यात आला होता. तेव्हापासून ग्रामीण रुग्णालयात शस्त्रक्रियांची व्याप्ती वाढवण्यासह विविध सुधारणा करण्याची मागणी जोर पकडू लागली. रुग्ण व परिसरातील गावांतील मागणी वाढू लागल्याने निधी उपलब्ध झाला. राष्ट्रीय ग्रामीण आरोग्य अभियान व लक्ष्य मोहिमेंतर्गत शस्त्रक्रिया विभागाचा विस्तार वाढवण्यात येत आहे.

जिल्हा शल्य चिकित्सक डॉ. अशोक थोरात, वैद्यकीय अधिकारी डॉ. प्रशांत खैरे यांनी या कामाची पाहणी केली. शस्त्रक्रिया विभागाच्या इमारतीचे नव्याने सुरू असलेले काम, त्याचा दर्जा, शस्त्रक्रिया विभागासाठी बांधकामात अत्यावश्यक असलेल्या बाबींची थोरात यांनी पाहणी केली. तीन महिन्यांपासून सुरू असलेली लसीकरण मोहीम कोरोना रुग्णांच्या संपर्कातील नागरिकांच्या अ‍ॅंटिजन टेस्ट याचा डॉ. थोरात यांनी आढावा घेतला. कामाबाबत समाधान व्यक्त केले.

विविध कंपन्यांच्या सामाजिक दायित्व निधीतून (सीएसआर फंड) मिळालेली रुग्णवाहिका व इतर साहित्याची माहिती डॉ. थोरात यांनी घेतली. अधीक्षक डॉ. शरद पाटील, डॉ. वीरेंद्र सिंग, डॉ. गिरीश भालेराव, डॉ. सुशील पवार, विजय पाटील यांच्यासह आरोग्य कर्मचारी उपस्थित होते.

-------------------

नवीन शस्त्रक्रिया विभागातील सुविधा

रुग्णालयात एका वेळी एकच प्रसूती शस्त्रक्रिया व अन्य रुग्णांवरील केवळ एक शस्त्रक्रिया करण्याची सुविधा होती. आता नवीन शस्त्रक्रिया विभागात विविध आजारांवरील एकाचवेळी तीन रुग्णांवर शस्त्रक्रिया होऊ शकतील. तर एका वेळी तीन प्रसूती शस्त्रक्रियाही होऊ शकतील. प्रसूती शस्त्रक्रियेसाठी वेगळी, तर अन्य शस्त्रक्रियांसाठी वेगळी व्यवस्था करण्यात आली आहे.

---------------------

दोडी ग्रामीण रुग्णालयात नवीन शस्त्रक्रिया विभागाच्या विस्तार कामाची पाहणी करताना जिल्हा शल्य चिकित्सक डॉ. अशोक थोरात. समवेत वैद्यकीय अधिकारी डॉ. प्रशांत खैरे, अधीक्षक डॉ. शरद पाटील, डॉ. वीरेंद्र सिंग आदींसह कर्मचारी. (०८ दोडी)

080721\08nsk_28_08072021_13.jpg

०८ दोडी