शहरात उच्चांकी, ३७.३ कमाल तपमान

शहराच्या हवामानात कमालीचा बदल होत असून, उन्हाची तीव्रता वाढत आहे. रविवारी (दि.२५) हंगामातील उच्चांकी ३७.३ इतक्या कमाल तपमानाची नोंद करण्यात आली. मार्चअखेर उन्हाच्या झळा अधिक तीव्र होत असल्याने नाशिककरांना उन्हाचा चटका जाणवत आहे.

नाशिक : शहराच्या हवामानात कमालीचा बदल होत असून, उन्हाची तीव्रता वाढत आहे. रविवारी (दि.२५) हंगामातील उच्चांकी ३७.३ इतक्या कमाल तपमानाची नोंद करण्यात आली. मार्चअखेर उन्हाच्या झळा अधिक तीव्र होत असल्याने नाशिककरांना उन्हाचा चटका जाणवत आहे. मागील वर्षाप्रमाणे यावर्षीही उन्हाची तीव्रता अधिक राहणार असल्याची शक्यता वर्तविली जात आहे. गेल्या वर्षी २५ मार्च रोजी ३८.४ अंश इतके कमाल तपमान नोंदविले गेले होते. जवळपास एक अंशाने जरी तपमान रविवारी कमी राहिले असले तरी पुढील काही दिवसांत तपमान वाढण्याची दाट शक्यता आहे. रविवारी कमाल तपमान ३७ अंशांपर्यंत राहिले तरी राज्यात सर्वाधिक नीचांकी किमान तपमानाची नोंद १०.५ नाशिकमध्ये झाली. यामुळे नाशिककरांना वाढत्या उन्हासोबत पहाटे व रात्री थंड वाराही जाणवला. कमाल तपमानाचा पारा ३५ अंशांच्या जवळपास स्थिरावत होता; मात्र काही दिवसांपासून तपमानाचा पारा रविवारी पुन्हा चढता झाल्याने थेट ३७ अंशांच्या पुढे सरकला. एकूणच पुढील दोन महिन्यांत शहर कमालीचे तापणार असल्याची चिंता नाशिककरांमध्ये व्यक्त केली जात आहे. वाढत्या उन्हामुळे अंगाची काहिली होऊ लागल्याने नाशिककरांकडून मोठ्या प्रमाणात वातानुकूलित यंत्रे, पंख्यांचा वापर केला जात आहे.