साळसाणे येथे विद्यार्थ्यांनी बस रोखली

साळसाणे येथे विद्यार्थ्यांनी बस रोखली

तळेगाव रोही : चांदवड तालुक्यातील साळसाणे येथे मनमाड ते लासलगाव जाणाऱ्या बस येत नाहीत. या बसच्या फेऱ्या कमी होतात. या कारणाने साळसाणे येथे विद्यार्थ्यांनी बस रोखली. कारण विद्यार्थी व प्रवाशी यांचे अतोनात हाल होत आहे. मनमाड आगाराच्या बसेस या कोजागरीनिमित्त वणी गडावर जादा बसेस म्हणून सोडल्याने सकाळी साडेदहा वाजेच्या आतील बसेस वेळेत न येणे व आलेल्या गाड्या न थांबणे यामुळे विद्यार्थीवर्गाचे हाल होत आहेत. लासलगावचे आगारप्रमुख व्ही. एस. भावसार यांच्याशी संपर्क साधला असता जादा जनता गाडी ही गांगुर्डेवाडीपर्यंत पाठवून दिल्यामुळे अडविलेली बस सोडली. साळसाणे येथून वाहेगाव व लासलगाव जाणारे विद्यार्थी १५० आहेत याचा विचार करावा, अशी मागणी विद्यार्थ्यांनी केली आहे. (वार्ताहर)