नांदगावला धनगर समाजाच्या वतीने रास्ता रोको

नांदगाव : धनगर समाजाला अनुसूचित जमातीचे आरक्षण लागू करून त्याची तत्काळ अंमलबजावणी व्हावी या व इतर मागण्यांसाठी तालुक्यातील सकल धनगर समाजाच्या वतीने येथील हुतात्मा चौकात रास्ता रोको आंदोलन करण्यात आले.

ठळक मुद्देया रास्ता रोकोमुळे औरंगाबाद, मालेगाव, चाळीसगाव, येवला या भागाकडे जाणारी वाहतूक खोळंबली होती. तासाहून अधिक काळ वाहतुकीची कोंडी झाली होती.

नांदगाव : धनगर समाजाला अनुसूचित जमातीचे आरक्षण लागू करून त्याची तत्काळ अंमलबजावणी व्हावी या व इतर मागण्यांसाठी तालुक्यातील सकल धनगर समाजाच्या वतीने येथील हुतात्मा चौकात रास्ता रोको आंदोलन करण्यात आले. या रास्ता रोकोमुळे औरंगाबाद, मालेगाव, चाळीसगाव, येवला या भागाकडे जाणारी वाहतूक खोळंबली होती. तासाहून अधिक काळ वाहतुकीची कोंडी झाली होती. आरक्षणाच्या मागणीसाठी तालुक्याच्या विविध भागांतून एकत्र आलेल्या धनगर समाजबांधवांनी ‘येळकोट येळकोट जय मल्हार, आरक्षण आमच्या हक्काचे आहे, कोण म्हणतंय देणार नाही घेतल्याशिवाय राहणार नाही’ अशा घोषणा देत वाहतूक अडवली. समाजातील विविध क्षेत्रांतील पदाधिकारी, नेते, कार्यकर्ते यांचा सहभाग लक्षवेधी होता. साक्षी संजय देवकथे या युवतीने आंदोलकांसमोर परखड असे केले. राज्यघटनेनुसार धनगर समाजाचा समावेश हा अनुसूचित जमातीमध्येच आहे; परंतु धनगड व धनगर असा वाद निर्माण करून धनगर समाजाला जाणीवपूर्वक मागील सत्तर वर्षे आरक्षणापासून वंचित ठेवल्याची भावना साक्षीने भाषणातून व्यक्त केली. तिच्या भाषणाला जोरदार प्रतिसाद मिळाला. मनमाडचे माजी नगराध्यक्ष साईनाथ गिडगे, माजी उपनगराध्यक्ष शिवाजीराव पाटील, मल्हार सेनेचे जिल्हाध्यक्ष सीताराम पिंगळे, सनी फसाटे, डॉ. गणेश चव्हाण, सुनील सोर, शरद आयनोर, बिरू शिंदे आदींची भाषणे झाली. धनगर समाजाच्या अनुसूचित जमातीमध्ये समावेश करावा, सोलापूर विद्यापीठास पुण्यश्लोक अहल्यादेवी होळकर यांचे नाव द्यावे, आरक्षणासाठी आत्महत्या केलेल्या परमेश्वर घोंगडे यांच्या कुटुंबीयांना २५ लाखांची आर्थिक मदत करावी, धनगर समाजातील विद्यार्थ्यांची थकीत शिष्यवृत्ती तत्काळ अदा करावी, मेंढपाळांना गायरान जमिनी राखीव ठेवाव्यात, पावसाळ्यात वनजमिनीवर मेंढपाळांना चराई कुरणे राखीव ठेवावीत आदी मागण्यांचे निवेदन तहसीलदार शिवकुमार आवळकंठे यांना सादर करण्यात आले. या आंदोलनाला आम आदमी पार्टी, भारिप बहुजन महासंघ, हिंदू खाटिक समाज, संतूजी बिग्रेड, राष्ट्रीय समाज पक्ष, राष्ट्रवादी काँग्रेस आदिंनी पाठिंबा दिला आहे.