नाशिक : ऑक्सिजनच्या सातत्यपूर्ण तुटवड्याने ऑक्सिजन बेड उपलब्ध होत नसल्याने जिल्ह्यात अनेक नागरिकांचा तडफडून मृत्यू होऊ लागला असताना नाशिकमध्ये ५ टन ऑक्सिजनची दररोज निर्मिती करणाऱ्या स्वस्तिक एअर सर्व्हिस प्रकल्पाचा शुभारंभ करण्यात आल्याने जिल्ह्यात ऑक्सिजनच्या उपलब्धतेला काहीसा हातभार लागू शकणार आहे.
नाशिक जिल्ह्यात ऑक्सिजनची उपलब्धता हीच सध्याची सर्वात मोठी समस्या आहे. अशा परिस्थितीमुळे कोणत्याही स्थितीत जिथून ऑक्सिजन मिळेल, तिथून उपलब्ध करून घेण्याचे धोरण शासनाने जाहीर केले होते. त्यानुसार जिल्ह्यातील स्थानिक नेतृत्वाने विविध कारणांमुळे बंद पडलेले ऑक्सिजनचे काही प्रकल्प पुन्हा सुरू करण्याबाबत चाचपणी करण्यात आली. दरम्यान, नाशिकच्या शिंदे टोलनाक्याजवळ असलेला स्वस्तिक एअर सर्व्हिसेस ही कंपनी वीज बिल थकबाकीसह काही अन्य तांत्रिक कारणांमुळे प्रदीर्घ काळापासून बंद होती. त्याबाबतची माहिती मिळताच काही स्थानिक नेतृत्वाने पुढाकार घेऊन ही कंपनी सुरू करण्यासाठी शासन दरबारी प्रयत्न केले. त्यानंतर मागील थकबाकीची बाब तशीच प्रलंबित ठेवून सध्या ही कंपनी पुन्हा सुरू करण्यास संमती मिळाली. त्यामुळे नाशिकच्या ऑक्सिजनच्या तुटवड्यात किमान काही प्रमाणात घट येऊ शकणार आहे. सध्या जिल्ह्यात ऑक्सिजनची मागणी १२५ टनहून अधिक आहे. मात्र, प्रत्यक्षात ऑक्सिजनचा पुरवठा मात्र ८० टनांच्या आसपासच होत असल्याने हा तुटवडा खासगी रुग्णालयांतील रुग्णांसह गंभीर रुग्णांसाठी जीवघेणा ठरत आहे. त्यामुळेच जिल्ह्यातील बंद पडलेले अन्य काही ऑक्सिजन प्रकल्प याप्रकारे सुरू करण्यासाठी शर्थीचे प्रयत्न सुरू आहेत.
इन्फो
७ किलोचे ७०० सिलिंडरची दररोज निर्मिती
नाशिकच्या या प्रकल्पातून एकूण सुमारे ५ टन ऑक्सिजनची निर्मिती करण्यात येणार आहे. त्यामुळे साधारणपणे दररोज ७ किलोचे साधारणपणे ६०० ते ७०० सिलिंडर या प्रकल्पातून उत्पादित केले जाणार आहेत. त्यातील कोणता ऑक्सिजन किती, कुणाला मिळणार त्याबाबत संबंधितांकडून अद्याप तरी कोणतेही दिशानिर्देश मिळालेले नाहीत. मात्र, हा ऑक्सिजन किमान काही रुग्णांचा जीव वाचवण्यास उपकारक ठरू शकणार आहे.