शेतकरी आपल्या शेतात कोणत्या पिकातून चार पैसे मिळतील या आशेने वेगवेगळी पिके घेण्याचा प्रयत्न करतो. दरवर्षी टोमॅटो, पोळ कांदा या पिकांना फाटा देऊन जळगाव नेऊर येथील राहुल ठोंबरे या शेतकऱ्याने २२ गुंठे क्षेत्रावर ‘आशा’ या वाणाची सिमला मिरचीची लागवड केली. लागवड केल्यापासून साधारणपणे आतापर्यंत रोपे, तार, बांबू, मल्चिंग पेपर, औषधे, खते असा साधारणपणे ७० ते ८० हजार रुपये खर्च करून, गेली १५ दिवसांपासून म्हणजे ५० व्या दिवसानंतर शिमला मिरची सुरू झाली. मागील हप्त्यात ११ किलोच्या कॅरेट ११५ रुपयाचा भाव मिळाला त्यात मजुरी व भाडे सुटले होते; पण परंतु नाशिक कृषी उत्पन्न बाजार समितीत १७५ कॅरेट शिमला मिरची नेली असता एका कॅरेटला अवघा ३५ रुपये भाव मिळाला, म्हणजे ३ रुपये किलो. त्याचे ६,१२५ रुपये हाताशी आले. त्यात ५२५ रुपये हमाली जाता शेतकऱ्याच्या पदरात ५ हजार ५९९ रुपये पडले त्यात गाडीभाडे ३ हजार व तोडण्यासाठी एका कॅरेटला १० रुपये असे ४ हजार ७५० रुपये खर्च आलेला असताना शेतकऱ्याला मात्र ८४९ रुपयावर समाधान मानावे लागले. कोरोना संकटानंतर शेतकऱ्यांपुढे भाजीपाला पिकांची मातीमोल भावाने विक्री हे मोठे संकट उभे राहिले असून त्या पैशातून शेतकऱ्यांचा खर्चही निघत नसल्याने कर्ज कसे फेडावे व कोणती पिके घ्यावी हा यक्षप्रश्न शेतकऱ्यांपुढे उभा राहिला आहे.
भाजीपाला फेकून देण्याची वेळ
शेतकऱ्यांनी आपल्या जवळ असलेल्या थोड्याफार पाण्यावर शिमला मिरची, टोमॅटो, कोबी, फ्लॉवर, गिलके, काकडी, कोथिंबीर अशी पिके घेण्याचा प्रयत्न केला; परंतु या भाजीपाल्याला आज मात्र शेतकऱ्यांना बाजार भावाअभावी फेकून देण्याची वेळ आलेली आहे. त्यातून खर्चदेखील वसूल होत नसल्याने अनेक शेतकऱ्यांनी भाजीपाला फेकून दिलेला आहे.
कोट...
यावर्षी साठवलेल्या पाण्यावर इतर पिकांकडे दुर्लक्ष करून शिमला मिरचीची लागवड केली. मोठ्या मेहनतीने शिमला मिरचीची नीगा राखून मिरचीही चालू झाली, परंतु आता मिळत असलेल्या भावातून केलेला खर्चही वाया जाण्याची भीती निर्माण झाली असून उसनवारीने आणलेले पैसे कसे फेडावे, हा यक्ष प्रश्न उभा राहिला आहे.
- राहुल ठोंबरे, शिमला मिरची उत्पादक
फोटो - १९ जळगावनेऊर १
190821\19nsk_13_19082021_13.jpg
शिमला मिरची