सिन्नर : माजी आमदार माणिकराव कोकाटे गटाचे संजय राधाकिसन नवसे यांची सिन्नरच्या उपनगराध्यक्षपदी बिनविरोध निवड झाली. पालिका कार्यालयात घेण्यात आलेल्या या बैठकीला आमदार राजाभाऊ वाजे गटाचे नगरसेवक अनुपस्थित राहिले.नामदेव लोंढे यांनी उपनगराध्यक्षपदाचा राजीनामा दिल्याने रिक्त पदासाठी तहसीलदार मनोजकुमार खैरनार यांच्या अध्यक्षतेखाली व मुख्याधिकारी संजय जाधव यांच्या उपस्थितीत नगरसेवकांच्या विशेष बैठकीचे आयोजन करण्यात आले होते. उपनगराध्यक्षपदासाठी नवसे यांच्या चार उमेदवारी अर्जाव्यतिरिक्त अन्य अर्ज दाखल न झाल्याने नवसे यांची बिनविरोध निवड झाल्याची घोषणा करण्यात आली. बैठकीस नगराध्यक्ष आश्विनी देशमुख, मावळते उपनगराध्यक्ष नामदेव लोंढे, माजी नगराध्यक्ष विठ्ठल उगले, नगरसेवक बापू गोजरे, मेहमूद दारूवाला, मल्लू पाबळे, हर्षद देशमुख, सुजाता गाडे, राजश्री कपोते, डॉ. प्रतिभा गारे, उज्ज्वला खालकर, शीतल कानडी, लता मुंडे, लता हिले, मंगला जाधव उपस्थित होते. नवसे यांची उपनगराध्यक्षपदी निवड जाहीर होताच कोकाटे समर्थकांनी जल्लोष केला. याप्रसंगी नवसे व लोंढे यांचा सत्कार करण्यात आला. यावेळी जिल्हा परिषदेचे माजी अर्थ व बांधकाम सभापती अ‍ॅड. राजेंद्र चव्हाणके, जिल्हा परिषद सदस्य राजेश नवाळे, तालुका कॉँग्रेसचे अध्यक्ष विनायक सांगळे यांनी नवसे यांचा सत्कार केला. त्यानंतर नवसे यांची मिरवणूक काढण्यात आली. छत्रपती शिवाजी महाराज व डॉ. बाबासाहेब आंबेडकर यांच्या पुतळ्यास पुष्पहार अर्पण करण्यात आला. (वार्ताहर)
सिन्नरच्या उपनगराध्यक्षपदी संजय नवसे
By admin | Updated: December 17, 2015 23:46 IST