नाशिक : नाशिकच्या साक्षी कानडी, ईश्वरी सावकार व रसिका शिंदे या तीन खेळाडूंची महाराष्ट्रातर्फे एकोणीस वर्षांखालील महिला क्रिकेट संघात निवड झाली आहे.
साक्षीने मागील हंगामात पुदुचेरी येथे खेळविण्यात आलेल्या टी-ट्वेंटी सामन्यांच्या स्पर्धेसाठी महाराष्ट्रातर्फे तेवीस वर्षांखालील महिला क्रिकेट संघाचेदेखील प्रतिनिधित्व केले होते. भारतीय क्रिकेट नियामक मंडळ, बीसीसीआयतर्फे १९ वर्षांखालील महिलांसाठी ५० षटकांची एकदिवसीय सामन्यांची स्पर्धा आयोजित करण्यात येते. त्या स्पर्धेसाठी नाशिक जिल्हा क्रिकेट संघटनेच्या तीन खेळाडूंची निवड झाली आहे.त्यांच्या या निवडीबद्दल एनडीसीएचे अध्यक्ष विनोद शहा आणि सचिव समीर रकटे यांनी त्यांचे अभिनंदन केले. निवड झालेल्या महिला संघाचे स्पर्धेपूर्वी पुणे येथे गोवा महिला संघसोबत सराव सामने खेळविण्यात येत आहेत. महाराष्ट्र संघाचा समावेश एलिट डी गटात असून, महिला एकदिवसीय सामन्यांच्या स्पर्धेचे साखळी सामने २८ सप्टेंबर ते ४ ऑक्टोबरदरम्यान सुरत येथे खेळविले जाणार आहेत. महाराष्ट्राचे सामने सौराष्ट्र, राजस्थान, उत्तराखंड , आंध्र प्रदेश, चंदिगड यांच्याविरुद्ध रंगणार आहेत.
फोटो
०८साक्षी
०८ईश्वरी
०८रसिका