शहरात सांस्कृतिक कार्यक्रमांची मेजवानी
नाशिक : अनलॉकनंतर नाशिकचे जनजीवन पूर्वपदावर आलेले आहे. त्यामुळे आता नाशिकमधील सांस्कृतिक कार्यक्रमांची रेलचेल देखील वाढली आहे. गेल्या काही दिवसांत शहरातील सांस्कृतिक क्षेत्रात कार्यक्रमांमध्ये वाढ झाल्याचे दिसते. त्यामुळे नाशिककर रसिक प्रेक्षकांना सांस्कृतिक कार्यक्रमांची मेजवानी मिळत आहे.
रोटरी क्लबच्यावतीने इंटरॅक्ट सप्ताह
नाशिक : विद्यार्थ्यांमधील नेतृत्व गुण कौशल्य विकासाला चालना मिळावी, यासाठी रोटरी क्लब ऑफ नाशिकच्यावतीने ‘इंटरॅक्ट वीक सप्ताह’ आयोजित करण्यात आला आहे. सोमवारपासून या सप्ताहाला प्रारंभ झाला. हा सप्ताह ऑनलाईन होणार असल्याची माहिती आयोजकांनी दिली. आठवडाभर चालणाऱ्या या सप्ताहात क्रीडा, कृषी, शिक्षण, आरोग्य, औद्येागिक, कला, साहित्य, सामाजिक असे विविध उपक्रम राबविले जाणार आहेत.
भ्रष्टाचार निर्मूलन समितीची बैठक
नाशिक : विभागीय भ्रष्टाचार निर्मूलन समितीच्या बैठकीत विभागीय आयुक्त राधाकृष्ण गमे यांनी भ्रष्टाचार प्रकरणे तत्काळ निकाली काढावीत, असे आदेश अधिकाऱ्यांना दिले. या बैठकीत विभागातील कामांचा आढावा घेण्यात आला. शासकीय कामकाजात सुलभता तसेच पारदर्शकता आणावी, अशा सूचना गमे यांनी दिल्या. नवनियुक्त अशासकीय सदस्यांशीदेखील यावेळी गर्म यांनी चर्चा केली.
वीजतारांना पतंगाच्या मांजाचा वेढा
नाशिक : पतंगोत्सव संपला असला, तरी अजूनही शहरातील वीज तारांवर पतंगांचा मांजा लटकलेला दिसत आहे. काही ठिकाणी तारांवरील मांजा खाली लोंबकळत असून, अनेक ठिकाणी मांजा तारांभोवत लपटलेला दिसून येत आहे. तारांवर पक्षी बसल्यास मांजामध्ये अडकण्याची शक्यता आहे.
उपनगर मार्गावर गतिरोधक टाकावा
नाशिक : उपनगर मार्गावर नुकतेच डांबरीकरण करण्यात आल्याने हा मार्ग वाहनधारकांसाठी सुलभ झाला आहे. या मार्गावरील मार्केट, रहिवासी क्षेत्र असल्याने नव्याने डांबरीकरण झालेल्या मार्गावर गतिरोधक टाकण्याची आवश्यकता आहे. विशेषत: टाकळीकडे जाणारा मार्ग तसेच शांती पार्ककडे जाणाऱ्या मार्गाजवळ गतिरोधक टाकण्याची गरज आहे.