----
कॉलेजरोडवर पुन्हा ‘रायडिंग’ची धूम
नाशिक : शहरातील कॉलेजरोड भागात पुन्हा ‘रायडिंग’ करणाऱ्या स्पोर्ट्स बाईकर्सकडून रॅश ड्रायव्हिंग केली जात असल्याने संताप व्यक्त होत आहे. महाविद्यालये खुली होताच रायडिंग करणाऱ्या दुचाकीस्वारांचे पेव फुटले आहे. शहर वाहतूक पोलिसांकडून कारवाईची मागणी केली जात आहे.
----
सावता माळी रस्ता ‘टी-पाॅईंट’वर वाहनांचा गोंधळ
वडाळागाव : रविशंकर मार्गावरील चौफुलीवर वाहतुकीचा गोंधळ निर्माण होऊ लागल्याने अपघातांना निमंत्रण मिळत आहे. संत सावता माळी कॅनॉल रोड टी-पाॅईंट तसेच वडाळागावात जाणाऱ्या रविशंकर मार्गावरील चौकात वाहनचालकांचा गोंधळ उडून अपघात घडत आहेत. या चौकामध्ये दोन्ही बाजूंनी वाहने भरधाव वेगाने येतात, त्यामुळे वळण घेणाऱ्या वाहनांची धडक होऊन अपघात घडत आहेत.
-----
वडाळा चाैफुलीजवळ वाहनांची अनधिकृत पार्किंग
वडाळागाव : वडाळा चौफुलीजवळील वडाळा रस्त्यावर गुलशन-ए-अमीन कॉलनीसमोर रस्त्याकडे दिवस-रात्र अनधिकृतपणे ट्रक एकापाठोपाठ उभ्या केल्या जात असल्याने वाहतुकीला अडथळा निर्माण होत आहे. तसेच गोठ्याजवळसुद्धा रात्रीच्या सुमारास मालवाहू ट्रकची पार्किंग केली जात असल्याने नागरिकांनी नाराजी व्यक्त केली आहे.
----
भंगारमालामुळे वाहतुकीला अडथळा
वडाळागाव : वडाळारोडवरील मुख्य रस्त्यावर असलेल्या चांदशावली बाबा दर्गाजवळ भंगार मालाच्या खरेदी-विक्रीच्या दुकानाचे अतिक्रमण वाढीस लागत असल्याने वाहतुकीला अडथळा निर्माण होत आहे. येथून रस्ता अरुंद असून रस्त्यालगतच भंगार मालची साठवणूक होत असल्याने रहदारीला अडथळा येत असल्याची तक्रार नागरिकांनी केली आहे.
----
वडाळागावात डासांचा वाढता उपद्रव
वडाळागाव : परिसरात मागील काही दिवसापासून डासांचा उपद्रव वाढल्यामुळे नागरिकात तीव्र नाराजी व्यक्त होत आहे. गेल्या दोन महिन्यापासून गावात डास प्रतिबंधात्मक धूर किंवा औषध फवारणी करण्यात आली नसल्याने डासांचा प्रादुर्भाव वाढीस लागल्याची तक्रार नागरिकांनी केली आहे. मनपाच्या हिवताप नियंत्रण विभागाकडून याकडे दुर्लक्ष होत असल्याचे नागरिकांचे म्हणणे आहे.
----
वडाळा बाजारात मास्कच्या वापराकडे दुर्लक्ष
वडाळागाव : येथील रजा चौक, जय मल्हार कॉलनीमध्ये भरणाऱ्या दररोजच्या ‘मिनी मार्केट’मध्ये कोरोना प्रतिबंधक उपाययोजना व नियमाचा पूर्णत: फज्जा उडत असल्याचे चित्र आहे. महापालिका प्रशासनाच्या आरोग्य विभागाकडून या बाजारात भेट देत कारवाई करण्याची मागणी होत आहे. बाजारातील विक्रेत्यांसह ग्राहकांपर्यंत कुणीही मास्कचा वापर तसेच सामाजिक सुरक्षित अंतर राखत नसल्याचे दिसून येत आहे. यामुळे वडाळागावात पुन्हा कोरोनाचा फैलाव होण्याची भीती व्यक्त होऊ लागली आहे.
---