बिटको रुग्णालयाचे नूतनीकरण
नाशिक - महापालिकेच्या आगामी अंदाजपत्रकात प्रत्येक नगरसेवकाला आपल्या प्रभागातील विकासकामे करण्यासाठी प्रत्येकी सव्वा कोटी याप्रमाणे १६६ कोटी रुपयांची तरतूद करण्यात आली आहे. त्याचबरोबर कोरोनाचे संकट बघता वैद्यकीय विभागासाठीही २५ कोटी रुपये अतिरिक्त तरतूद करण्यात आली आहे, अशी माहिती स्थायी समितीचे सभापती गणेश गिते यांनी दिली.
महापालिकेचे अंदाजपत्रक स्थायी समितीने तयार केले असून लवकरच ते महासभेवर सादर होणार आहे. सध्या कोरोनाचा संकटकाळ पुन्हा सुरू झाला असून, दुसरीकडे महापालिकेच्या निवडणुका तोंडावर आहेत. त्यामुळे नगरसेवकही विकासकामे होत नसल्याने हवालदिल झाले आहेत. या संदर्भात अंदाजपत्रक तयार करताना योग्य सांगड घातली असल्याचे त्यांनी ‘लोकमत’ला सांगितले.
प्रश्न - गेल्या वर्षी कोरोनाचे संकट होते, आता पुन्हा संसर्ग वाढला आहे; त्यामुळे अंदाजपत्रकात वैद्यकीय विभागासाठी काही विशेष तरतूद केली आहे काय?
गिते - होय. गेल्या वर्षी कोरोनाचे संकट आल्यानंतर महापालिकेला आपली रुग्णालये सज्ज करावी लागली. डॉ. झाकीर हुसेन रुग्णालय केवळ कोरोना संसर्गासाठी राखीव ठेवावे लागले; तर नवीन बिटको रुग्णालय तातडीने सुरू करावे लागले. कोरोना चाचण्यांचे किट, इंजेक्शन्स खरेदी अशा अनेक प्रकारची खरेदी करावी लागली; त्यामुळे सुमारे ५० कोटी रुपयांचा खर्च झाला. त्याचा विचार करून यंदा जुन्या बिटको रुग्णालयाच्या नूतनीकरणासाठी २५ कोटी रुपयांची तरतूद करण्यात आली आहे. त्याचबरोबर प्रशासनाने वैद्यकीय विभागासाठी केलेल्या तरतुदीच्या पलीकडे आणखी २५ कोटी रुपयांची अतिरिक्त तरतूद करण्यात आली आहे. त्यामुळे कोरोनाच्या काळात महापालिका कुठेही कमी पडणार नाही.
प्रश्न - कोरोनामुळे गेल्या वर्षी कोणत्याही प्रकारे नागरी कामे झाली नाहीत आणि आताही पुन्हा कोरोनाचे संकट आहे. त्यामुळे निवडणुकीच्या तोंडावर कामे होतील किंवा नाही याबाबत नगरसेवकांत चिंता आहे.
गिते- नगरसेवकांची चिंता रास्त असली तरी त्यांची कामे व्हावीत यासाठी अंदाजपत्रकात प्रामाणिक प्रयत्न सुरू आहे. आयुक्तांनी त्यांच्या अंदाजपत्रकात ‘नगरसेवक स्वेच्छाधिकार निधी’ आणि ‘प्रभाग विकास निधी’ अशी एकूण ४० लाख रुपये तरतूद करण्यात आली आहे. या पलीकडे प्रत्येक नगरसेवकाला प्रभागात विकासकामे करण्यासाठी सव्वा कोटी याप्रमाणे १६६ कोटी रुपयांची तरतूद करण्यात आली आहे.
प्रश्न - अन्य कोणत्या महत्त्वाच्या योजनांसाठी तरतूद आहे?
गिते - बिटको रुग्णालयात पदव्युत्तर पदवी वैद्यकीय शिक्षण सुरू करणे, चित्रपटमहर्षी दादासाहेब फाळके यांचा बीओटीच्या माध्यमातून विकास तसेच महापालिकेच्या विद्युत पुरवठ्यासाठी सोलर याेजना अशा प्रकारची तरतूद करण्यात आली आहे.