३२ ग्रामपंचायतींसाठी शांततेत मतदान

घोटी : इगतपुरी तालुक्यातील ३२ ग्रामपंचायतींच्या निवडणुकांसाठी आज शांततेत मतदान झाले. सकाळपासून मतदारांनी मतदान केंद्रावर गर्दी केल्याने मतदानाचा वेग सकाळपासूनच वाढला होता. दुपारी शुकशुकाट जाणवणाऱ्या मतदान केंद्रावर सायंकाळच्या वेळी मतदानाच्या आकडेवारीत वाढ होत असताना दिसून आली. दरम्यान, तालुक्यातील घोटी खुर्द या गावात सकाळीच तणावाचे वातावरण निर्माण झाले होते.या महिन्यात मुदत संपणाऱ्या इगतपुरी तालुक्यातील ३२ ग्रामपंचायतींसाठी आज मतदान घेण्यात आले. इगतपुरी तालुक्यातील ३७ ग्रामपंचायतींसाठी निवडणूक कार्यक्रम जाहीर केला होता. माघारीच्या दिवशी पिंपळगाव घाडगा, वाळविहीर, आवळखेड भावली खुर्द आणि चिंचलेखैरे या पाच गावांची निवडणूक बिनविरोध झाली असल्याने उर्वरित ३२ ग्रामपंचायतींसाठी मतदान घेण्यात आले. दरम्यान, ग्रामपंचायत निवडणुकीच्या आज झालेल्या महत्त्वपूर्ण तिसऱ्या टप्प्यात तालुक्यातील घोटी, गोंदे, वाडीवऱ्हे, टाकेद या राजकीयदृष्ट्या महत्त्वाच्या ग्रामपंचायतींचा समावेश असल्याने संपूर्ण तालुक्याचे लक्ष आज होणाऱ्या मतदानाकडे लागले होते. आज झालेल्या मतदानात तालुक्यातील घोटीसह खंबाळे, माणिकखांब, सांजेगाव, वाडीवऱ्हे, गोंदे दुमाला, मुकणे, साकूर, पिंपळगाव डुकरा, नांदगाव बु।।, घोटी खुर्द, भरवीर खुर्द, जानोरी, शेणीत, काळुस्ते, वाघेरे, बोरली, मानवेढे, पिंप्री सद्रोद्दिन, टिटोली, भावली बु।।, कुरुंगवाडी, तळोशी, आंबेवाडी, टाकेद बु., अडसरे बु., धामणगाव, बेलगाव तऱ्हाळे, निनावी, टाकेद खुर्द, खेड भैरव, त्रिंगलवाडी व कुऱ्हेगाव आदि प्रतिष्ठित गावांच्या ग्रामपंचायतींचा समावेश आहे. दरम्यान, निवडणूक शांततेत पार पडावी, यासाठी तहसील विभागाने खबरदारी घेत मतदान केंद्रावर मोठ्या प्रमाणात पोलीस बंदोबस्त तैनात करण्यात आला होता. तहसीलदार महेंद्र पवार यांच्यासह नायब तहसीलदार जितेंद्र केदारे, सहायक पोलीस निरीक्षक ज्ञानेश्वर वारे मतदान केंद्रांवर लक्ष ठेवून होते.