लोहोणेर : लोहोणेर-भऊर रस्त्यावर शिव नाल्याजवळ पिकअप व दुचाकी यांच्यात आज सकाळी १० वाजण्याच्या दरम्यान झालेल्या अपघातात दुचाकीस्वार योगेश मुरलीधर निफाडे (२८) रा.शिरवाडे वणी हा ठार झाला. याबाबत भऊर येथील पोलीस पाटील भरत पवार यांनी देवळा पोलीस ठाण्यात माहिती दिली. शिरवाडे वणी येथील युवक योगेश मुरलीधर निफाडे (२८) हा कळवणहून आपल्या हीरो होंडा स्पेनल्डर प्रो या दुचाकीने (एम.एच.१५ एफ.इ.९५३१) लोहोणेरकडे जात असताना, दहा वाजण्याच्या दरम्यान भऊर नेपाळी चौफुली पास करून, पुढे भरधाव वेगाने जात असताना, समोरून येणाऱ्या पिकअपने (एम. एच.४१ ए. यु. ०४५१) दुचाकीस्वाराला जोरदार धडक दिली. दुचाकीस्वार योगेश निफाडे याच्या दोन्हीही पायाला, हाताला व डोक्याला जबर मार लागल्याने गंभीर जखमी झाला. त्यास तातडीने कळवण येथील उपजिल्हा रुग्णालयात हलविण्यात आले. तेथे प्राथमिक उपचार केल्यानंतर पुढील उपचारासाठी नाशिक येथील जिल्हा रुग्णालयात नेत असतानाच त्याचा मृत्यू झाला. तो श्रीराम फर्टिलायझर कंपनीत कामाला होता. त्याच्यापश्चात आई, वडील, दोन भाऊ असा परिवार आहे. त्याच्यापश्चात आई, वडील, दोन भाऊ असा परिवार आहे. पोलीस निरीक्षक सुहास देशमुख यांच्या मार्गदर्शनाखाली पुढील तपास करण्यात येत आहे. याबाबत भऊर येेथील बापू पवार, दिलीप पवार, चंद्रकांत पवार, रामदास पवार, भाऊराव पवार दीपक पवार आदींनी अपघातग्रस्त युवकांस रुग्णालयात हलविण्यासाठी प्रयत्न केले.
(२९ लोहोणेर ॲक्सिडेंट)