----
पत्ता विचारण्याच्या बहाण्याने सोनसाखळी खेचली
नाशिक रोड : पत्ता विचारण्याचा बहाणा करत, दुचाकीने आलेल्या दोघा चोरट्यांपैकी एकाने साठ वर्षीय महिलेच्या गळ्यातील सोनसाखली हिसकावून पळ काढल्याची घटना सामनगाव रोड परिसरात घडली. या प्रकरणी नाशिक रोड पोलीस ठाण्यात जबरी चोरीचा गुन्हा दाखल करण्यात आला आहे.
मंजुळा लक्ष्मण वाघचौरे (६० रा.शिवअमृत अपा.भागवत मळा) यांनी या प्रकरणी तक्रार दाखल केली आहे. वाघचौरे या सोमवारी (दि.८) सायंकाळच्या सुमारास इमारतीच्या तळमजल्यावर राहणाऱ्या सुमनबाई भागवत यांच्या घरासमोर गप्पा मारत असताना, चोरट्यांनी त्यांच्या गळ्यातील गंठण आणि मंगळसूत्र असा सुमारे १ लाख ७५ हजार रुपये किमतीचे दागिने ओरबाडून पलायन केल्याचे फिर्यादीत म्हटले आहे.
.....
कोयत्याचा धाक दाखवून दहशत पसरविण्याचा प्रयत्न
नाशिक : भाडेकरूची माहिती विचारत एका संशयिताने महिलेला कोयत्याचा धाक दाखवित जीवे ठार मारण्याची धमकी दिल्याची घटना अशोकनगर भागात घडली. या घटनेनंतर संशयितांनी परिसरात कोयत्याचा धाक दाखवून अनेकांना शिवीगाळ केल्याचे तक्रारीत म्हटले असून, या प्रकरणी सातपूर पोलीस ठाण्यात गुन्हा दाखल करण्यात आला आहे.
प्रदीप दुलाजी खंदारे (२७ रा.श्रमिकनगर) असे दहशत पसरविणाऱ्या संशयिताचे नाव आहे. या प्रकरणी ललित दिनेश गवांदे (रा.राज्य कर्मचारी वसाहत) याने तक्रार दाखल केली आहे. सोमवारी (दि.८) संशयिताने गवांदे यांचे घर गाठून पूर्वी राहत असलेल्या भाडेकरूची माहिती घेतली. यावेळी कावेरी गवांदे यांनी त्यास आम्हाला माहीत नसल्याचे सांगितल्याने, संतप्त संशयिताने कोयत्याचा दाखवून त्यांना जीवे ठार मारण्याची धमकी दिली. यानंतर, संशयिताने परिसरात शिवीगाळ करीत ये-जा करणाऱ्या नागरिकांना कोयता दाखवून दहशत माजविल्याचे फिर्यादीत म्हटले आहे.
.....
वृद्धाची गळफास घेत आत्महत्या
नाशिक : शांतिनिकेतन कॉलनीत राहणाऱ्या एका ६० वर्षीय वृद्धाने गळफास लावून घेत आत्महत्या केली. या व्यक्तीच्या आत्महत्येचे कारण समजू शकले नाही. या प्रकरणी गंगापूर पोलीस ठाण्यात गुन्हा दाखल करण्यात आला आहे. विठोबा उद्धव आवस्कर (रा.सभागृहा मागे, मनपा गार्डनजवळ) असे आत्महत्या करणाऱ्या वृद्धाचे नाव आहे. आवस्कर यांनी सोमवारी (दि.८) दुपारच्या सुमारास अज्ञात कारणातून आपल्या राहत्या घरात छताच्या लोखंडी कडीस नायलॉन दोरी बांधून गळफास लावून घेतला होता. त्यात त्याचा मृत्यू झाला. या प्रकरणी शिवगंगा साबळे यांनी खबर दिल्याने गंगापूर पोलीस ठाण्यात मृत्यूची नोंद करण्यात आली आहे.