लोकमत न्यूज नेटवर्क
इंदिरानगर : शेतावर मजुरीसाठी आलेल्या अल्पवयीन मुलीशी प्रेमसंबंध करून तिला गरोदर केल्याची घटना पाथर्डीगावात उघडकीस आली आहे. या प्रकरणी संशयित आरोपी कांतीलाल गवळी याच्यावर इंदिरानगर पोलीस ठाण्यात बलात्काराचा गुन्हा दाखल करण्यात आला आहे.
पोलिसांनी दिलेल्या माहितीनुसार, त्र्यंबकेश्वर तालुक्यातील एका गावात पीडिता आपल्या कुटुंबासह राहते. शुक्रवारी (दि. ९) रात्री दोन वाजता पीडितेच्या पोटात दुखू लागल्याने तिला तातडीने गावातील सरकारी दवाखान्यात औषध उपचारासाठी दाखल करण्यात आले. डॉक्टरांनी औषध उपचार करताना पीडित मुलीला तपासले असता ती गरोदर असल्याचे सांगितले. त्यामुळे पीडितेच्या वडिलांनी पीडितेला विचारपूस केली. या वेळी तिने दिलेल्या माहितीनुसार, सप्टेंबर २०२० मध्ये गावातील २० ते २५ मजूर पाथर्डी गाव येथील द्राक्ष मळ्यात कामासाठी आले होते. त्या वेळी पीडिता व कांतीलाल गवळी यांच्यात प्रेमसंबंध निर्माण होऊन त्यांनी वेळोवेळी लैंगिक संबंध ठेवले होते. त्यामुळे ती गरोदर झाल्याचे पीडितेने सांगितले. दरम्यान, पीडितेला जास्त त्रास होऊ लागल्याने तिला नाशिक जिल्हा रुग्णालयात आणले असता तिची प्रसूती झाली. मात्र तिला झालेल्या मुलाचा मृत्यू झाल्याची माहिती डॉक्टरांनी दिली.