सायकल दुरुस्तीची वाढली कामे
नाशिक : अनलॉकनंतर दुकाने सुरू झाली असून, सध्या लहान मुलांच्या सायकल दुरुस्तीची कामे सायकल कारागिरांकडे येऊ लागली आहेत. सध्या शाळा बंद असल्याने तसेच लॉकडाऊनमुळे मुलांना बाहेर पडता येत नसल्यामुळे आता अनलॉकनंतर मुलांच्या पालकांनी सायकली दुरुस्तीसाठी काढल्या आहेत. त्यामुळे कारागिरांच्या हाताला काम मिळाले आहे.
बँकांमध्ये ज्येष्ठ नागरिकांची गर्दी
नाशिक : जून महिन्याच्या पहिल्या तारखेपासून ते आत पाच तारखेपर्यंत ज्येष्ठ नागरिकांची बँकांमध्ये गर्दी होत असते. बँकांमध्ये जमा होणारी पेन्शन घेण्यासाठी ज्येष्ठ नागरिकांच्या रांगा लागत आहेत. सकाळपासूनच ज्येष्ठ नागरिक बँकाच्या बाहेर उभे राहत आहेत. अशा खातेदारांसाठी बँकांनी शेड्स उभारले असल्याने त्यांना दिलासा मिळाला आहे.
शेतीवर मजूर परतू लागले
नाशिक : कारेानामुळे गावी गेलेले मजूर आता शेतकामांवर परतू लागल्याने शेतकऱ्यांना दिलासा मिळाला आहे. काेरोनाच्या कालावधीत अनेक मजूर गावी गेल्याने तर काही मजूर कामावर येत नसल्याने शेतकामांचा खोळंबा झाला होता. आता कोरोनाचा प्रभाव कमी झाल्यामुळे गावी गेेलेले मजूर परतू लागले आहेत. त्यामुळे रखडलेली काम सुरू झाली आहेत.
कोविड सेंटरला मदतीचा ओघ नाशिक : कोरोनाचा प्रभाव कमी झाल्यामुळे कोविड सेंटर्स ओस पडू लागली असली तरी सेवाभावी संस्था तसेच सामाजिक काम करणाऱ्या कार्यकर्त्यांकडून कोविड सेंटर्सला मदतीचा ओघ सुरूच आहे. अनेक ठिकाणी ऑक्सिजन कॉन्सन्ट्रेटर, व्हीलचेअर, व्हेंटिलेटर्स अशी मदत केली जात आहे. या मदतीमुळे आरोग्य व्यवस्था बळकट होण्यास मदत होत आहे. मानवधन संस्थेचा वर्धापन दिन कार्यक्रम
नाशिक : मानवधन सामाजिक शैक्षणिक विकास संस्थेचा वर्धापन दिन येत्या शनिवारी साजरा केला जाणार आहे. हा सोहळा ऑनलाइन पद्धतीने साजरा केला जाणार असल्याचे आयोजकांनी सांगितले. यानिमित्ताने विविध उपक्रमांचेदेखील आयोजन करण्यात आले आहे. मान्यवरांच्या उपस्थितीत संस्थापक प्रकाश कोल्हे यांच्या पुस्तकाचे प्रकाशन होणार आहे.
रस्त्यांवरील खोदकामांमुळे अडथळा
नाशिक : शहरातील मुख्य रस्ते तसेच बाजारपेठांच्या मार्गावर खोदकाम करण्यात येत असल्यामुळे वाहतुकीस अडथळा निर्माण होत आहे. गेल्या महिनाभरापासून सुरू असलेले काम संथ गतीने सुरू असल्याने सर्वसामान्य नागरिकांची गैरसोय होत आहे. विशेषत: मुंदडा मार्केट, दहीपूल, नेहरू चौक भागातील रस्त्यांवरील खोदकामामुळे वाहतूक कोंडी होत आहे.