सरदवाडी शाळेत ऑनलाईन बालमहोत्सव

सिन्नर : कोविड प्रादुर्भावामुळे विद्यार्थी शाळेत येऊ शकत नाहीत, बालमहोत्सवातील मौजमजेपासून विद्यार्थी वंचित राहू नयेत यासाठी त्यांना घरबसल्या बालमहोत्सवाचा आनंद देण्याचा प्रयत्न तालुक्यातील सरदवाडी येथील प्राथमिक विद्यामंदिर शाळेने केला आहे. शाळेमध्ये बालकांच्या संपूर्ण विकासासाठी आवश्यक असलेल्या १२ व्यवस्थांचे प्रदर्शन भरविण्यात आले व ऑनलाईन पद्धतीने विद्यार्थ्यांपर्यंत त्याची माहिती पोहोचविण्यात आली. या बालमहोत्सवाचे उद्घाटन शाळेचे अधीक्षक व कार्यकारी मंडळाचे सदस्य राहुल मुळे व मुख्याध्यापिका सुरेखा जेजूरकर यांच्या हस्ते करण्यात आले. घर, स्वयंपाकघर, बगीचा, कला शाळा, कार्यशाळा, रंगमंच, क्रीडांगण, पोहण्याचा तलाव, प्रदर्शन दालन, विज्ञान प्रयोगशाळा, चित्र पुस्तकालय, प्राणी-पक्षी संग्रहालय, वस्तूसंग्रहालय अशा बारा अवस्थांचे प्रदर्शन भरवून त्याची माहिती विद्यार्थ्यांसह पालकांना देण्यात आली. यावेळी ऑनलाईन पद्धतीने ‘गुगल मिट’च्या माध्यमातून पालक व बालके, प्राथमिक व बालक मंदिरातील शिक्षक उपस्थित होते. शालेय समितीचे अध्यक्ष मंगेश कुलकर्णी यांनी बालमहोत्सवाच्या आयोजनात मोलाचे मार्गदर्शन केले. बालमहोत्सवाच्या यशस्वितेसाठी बालक मंदिर शिक्षिका अनुपमा रसाळ, वंदना साबळे, हंसा कुलकर्णी, शीला डावरे, कलाशिक्षिका प्रीती पवार, सायली मालपाठक, कदम, अंकिता गुजराथी आदींसह शिक्षक, शिक्षकेतर कर्मचारी यांनी परिश्रम घेतले.