नाशिक : शैक्षणिक वर्ष २०२१-२२ मधील आरटीई प्रवेश प्रक्रियेअंतर्गत ऑनलाईन अर्ज करण्यास ३० मार्चपर्यंत संदी उपलब्ध करून देण्यात आली असून आरटीईच्या संकेतस्थळावर शनिवार(दि.२७) सायंकाळपर्यंत सुमारे १२ हजार ४२६ विद्यार्थ्यांच्या पालकांनी ऑनलाईन अर्ज सादर केले आहे.
नाशिक जिल्ह्यातील ४५० शाळांमधील ४ हजार ५४४ जागांसाठी आरटीई प्रवेश प्रक्रिया राबविण्यात येत असून पात्र विद्यार्थ्यांच्या पालकांना आरटीईअंतर्गत प्रवेशासाठी यापूर्वी २१ मार्चपर्यंत ऑनलाइन अर्ज करण्याची मुदत देण्यात आली होती. ही मूदत वाढवून देण्यात आली असून आता मंगळवार (दि.३०)पर्यंत ऑनलाईन अर्ज सादर करता येणार आहे. शहरातील ९१ शाळांसह जिल्ह्यातील ४५० शाळांनी प्रवेश प्रक्रिया राबविण्यासाठी नोंदणी केलेली असून शहरातील ९१ शाळांमध्ये १ हजार ५४६ तर उर्वरित जिल्ह्यातील ३५९ शाळांमध्ये २९९८ विद्यार्थ्यांसाठी आरटीई अंतर्गत जागा राखीव आहे. त्यासाठी आतापर्यंत सुमारे १२ हजार४२६ अर्ज प्राप्त झाले आहेत. यावर्षी मागील वर्षाच्या तुलनेत तीन शाळांची वाढ झाली असली आहे. मात्र आर्थिक दुर्बल व मागास प्रवर्गातील विद्यार्थ्यांसाठी राखीव २५ टक्के जागांमध्ये तब्बल १ हजार १३ जागांनी घट झाली आहे. त्यामुळे अर्ज करणाऱ्या सर्वच विद्यार्थ्यांना प्रवेश मिळणे शक्य नसल्याने राज्य पातळीवर एकाच वेळी सोडत काढली जाणार आहे. त्याचप्रमाणे उपलब्ध जागांच्या प्रमाणातच प्रतिक्षा यादीही या सोडतीच्या माध्यमातून जाहीर केली जाणार आहे.
इन्फो-
प्रवेशासाठी आवश्यक कागदपत्र
आरटीई प्रवेश प्रक्रियेत लॉटरीच्या माध्यमातून प्रवेशाची संधी मिळणाऱ्या विद्यार्थ्यांना प्रवेशासाठी रहिवासाचा पत्ता असणारा पुरावा, जन्माचा दाखला, बालक वंचित घटकातील असल्यास जातीची नोंद करण्यासाठी जातीचे प्रमाणपत्र, बालक आर्थिक दुर्बल गटातील असल्यास उत्पन्नाचा दाखला आदी कागदपत्रे गटशिक्षणाधिकारी स्तरावरील पडताळणी समितीकडे सादर करावे लागणार असल्याची माहिती शिक्षण विभागाने दिली आहे.