----
मालेगावी जबरी चोरी
मालेगाव : शहरातील फतेह मैदान येथे मंगळवारी (दि.२६) दुपारी १ वाजेच्या सुमारास जबरी चोरी केल्याप्रकरणी मोहंमद आमीन अंजूम उर्फ आरीफ पुडी (२०) रा. यासीन मियाका तकीया याचे विरोधात आझादनगर पोलिसात गुन्हा दाखल करण्यात आला असून आरोपीस अटक करण्यात आली आहे. आवेश अहमद हमीद हसन (१७) रा. नयापुरा, फतेह मैदान यांनी फिर्याद दिली. आरोपी मोहंमद आमीन याने फिर्यादीला थांबवून बळजबरीने त्यांच्या खिशातून रोकड काढली. फिर्यादीने विरोध केला असता आरोपीने त्याला कटर मारून जखमी केले. अधिक तपास उपनिरीक्षक सय्यद करीत आहेत.
-----
गळफास घेऊन एकाची आत्महत्या
मालेगाव : शहरातील जुना आग्रा रोडवर नानावटी पेट्रोल पंपासमोर असलेल्या भाला कॉम्प्लेक्समधील फ्लॅटमध्ये अंकित विजय नाबरीया (२६) याने गळफास घेऊन आत्महत्या केली. सतीश झुंबरलाल उपाध्ये रा. शनिवार वॉर्ड, आझाद चौक यांनी छावणी पोलिसात खबर दिली. पोलिसांनी कस्मात मृत्यूची नोंद केली आहे. गेल्या सोमवारी रात्री पावणेआठ वाजेच्या सुमारास हा प्रकार निदर्शनास आला. सतीश उपाध्ये हे अंकीतच्या घरी रिकामे डबे घेऊन गेले असता त्यांनी दरवाजा ठोठावला, परंतु दरवाजा उघडला गेला नाही. मोबाइलही उचलला नाही म्हणून इमारतीखालील लोकांना बोलावून दरवाजा उघडला असता अंकीत नाबरीयाने साडीच्या सहाय्याने पंख्यास गळफास घेतलेला आढळून आला. त्यास सामान्य रुग्णालयात उपचारार्थ दाखल केले असता डॉक्टरांनी मृत घोषित केले. पुढील तपास सहाय्यक उपनिरीक्षक चव्हाण करीत आहेत.
----