निफाडला विविध समित्यांची निवड

निफाड नगरपंचायतीच्या चार समित्यांची निवडणूक बिनविरोध संपन्न

निफाड : निफाड नगरपंचायतीच्या चार विषय समित्यांच्या सभापती पदासाठीची निवडणूक बिनविरोध होऊन नवीन चार सभापती बिनविरोध निवडण्यात आले  निफाडचे तहसीलदार विनोद भामरे निवडणूक पीठासन अधिकारी म्हणून उपस्थित होते. निफाड नगरपंचायतीच्या शिक्षण व आरोग्य समिती सभापतिपदी एकनाथ तळवाडे, सार्वजनिक बांधकाम समितीच्या सभापती म्हणून नयना निकाळे, महिला व बालकल्याण समितीच्या सभापती म्हणून चारु शीला कर्डिले, तर पाणीपुरवठा व जलनिस्सारण समितीच्या सभापतिपदी आनंद बिवालकर यांची बिनविरोध निवड झाली.  उपनगराध्यक्ष जावेद शेख यांची नियोजन समितीचे पदसिद्ध सभापती म्हणून निवड झाली आहे. नगराध्यक्ष हे स्थायी समितीचे पदसिद्ध अध्यक्ष असल्याने नगराध्यक्ष राजाभाऊ शेलार यांच्या अध्यक्षतेखाली स्थायी समिती गठित झाली आहे. स्थायी ही महत्त्वाची समिती असून, निफाड नगरपंचायतीच्या सर्व समित्यांचे सभापती भाजपा-सेना युतीचे झाले आहेत. त्यामुळे नगरपंचायतीच्या विकासकामांना गती प्राप्त होणार असल्याचे नगराध्यक्ष राजाभाऊ शेलार यांनी आजच्या निवडीनंतर सांगितले. सर्व नवनिर्वाचित सभापतींचा यावेळी सत्कार करण्यात आला.  याप्रसंगी मुख्याधिकारी किशोर चव्हाण, नगरसेवक मुकुंद होळकर, दिलीप कापसे, सुनीता कुंदे, मंगल वाघ, स्वाती गाजरे, नूरजहाँ पठाण, अलका पवार, लक्ष्मी पवार आदि उपस्थित होते. (वार्ताहर)