नाशिककरांना नव्या वर्षाची ‘नवी भेट’

नवे वर्ष नवी आशा : बसस्थानके टाकणार कात; पार्किंगची सुविधा मिळणार

नाशिक : नवे वर्ष नवे उमेद घेऊन येते त्यामुळेच सामान्यत: नव्या वर्षाविषयी नागरिकांना आकर्षण असते. व्यक्तिगत जीवनात ज्याप्रमाणे काही चांगले घडेल अशी अपेक्षा असते त्याच धर्तीवर सार्वजनिक जीवनातदेखील शहरासाठी, जिल्ह्यासाठी सकारात्मक घडण्याची अपेक्षा असते. यंदाही नववर्ष नाशिककरांना नव्या योजनांचे गिफ्ट घेऊन येणार आहे. या नव्या वर्षात शहरात अनेक योजनांची नांदी असून, शहरातील अनेक नवे प्रकल्प साकारले जाणार आहेत. शहरातील प्रमुख बसस्थानकांचे रुपडे पालटणार असून, विमानतळाच्या धर्तीवर त्यांचा विकास केला जाणार आहे. तसेच काही बसेस वायफाय केले जाणार आहेत. सामान्यत: नागरिकांच्या दृष्टिने महापालिकेशी संबंध येत असतो. नव्या वर्षात महापालिकेच्या वतीने डिजीटल कामकाजावर भर दिला जाणार असून ‘ई’पार्किंग, मॅकेनिकल पार्किंग तसेच महापुरा आधी सतर्क करणारी ई फ्लड सिस्टीम अंमलात येणार आहे. पोलिसांच्या वतीने विविध प्रकारच्या परवानग्या आॅनलाइन दिल्या जाणार आहेत.वायफाय बस, हायफाय स्थानकनवीन वर्ष प्रवाशांना विविध सुखसोयींसह प्रवास सुखकर करण्यावर भर देणारे असणार आहे. नाशिक शहराची प्रमुख ओळख असणारे जुने सीबीएस, मेळा बसस्थानक आणि महामार्ग बसस्थानकाचे आधुनिकीकरण केले जाणार आहे. महामार्ग बसस्थानकावर अत्याधुनिक व सर्वसोयींयुक्त असा बसपोर्ट केला जाणार आहे. सटाणा-नाशिक व मालेगाव-नाशिक या बसेसच्या फेऱ्या वाढविल्या जाणार आहेत. बसमध्ये चढताना खिडकीतून रुमाल टाकून जागा धरण्याच्या प्रकाराला पूर्णपणे पायबंद घातला जाणार आहे. बस बसस्थानकात येताच सर्व खिडक्यांच्या काचा बंद केल्या जाणार असून, प्रवाशांनी दरवाजातून रांगेत चढूनच जागा पकडणे सक्तीचे केले जाणार आहे. याची शहरातील सर्व बसस्थानकांमध्ये कडक अंमलबजावणी केली जाणार आहे. नाशिक परिक्षेत्रातील सर्व बसेसना मोफत वायफायची सुविधा दिली जाणार आहे. यात स्थानिक पातळीपासून लांबपल्ल्याच्या गाड्यांमध्येही वायफायची सुविधा मिळणार आहे. याशिवाय ‘एसटीचा प्रवास- सुखकर प्रवास’ या ब्रीदवाक्यावर भर देत जास्तीत जास्त संख्येने प्रवासी एसटी महामंडळाच्या बसमधूनच प्रवास करतील यासाठी विशेष प्रयत्न केले जाणार आहेत. यासाठी चालक, वाहक यांना उद्दिष्ट ठरवून दिले जाणार आहे.