नाशिकरोड कारागृहातील कर्मचाऱ्यांना टिप्परच्या म्होरक्याकडून मारहाण

कारागृहातील प्रकार : रेडिओ चॅनल बदलण्यावरून वाद; गुन्हा दाखल

नाशिकरोड : नाशिकरोड मध्यवर्ती कारागृहात रेडिओचे चॅनल बदलण्याच्या कारणावरून कैद्यांमध्ये झालेला वाद सोडविण्यासाठी गेलेल्या कारागृह कर्मचाऱ्यांना सिडकोतील कुविख्यात टिप्पर गँगचा म्होरक्या व त्याच्या मोठ्या भावाने शिवीगाळ करून मारहाण केल्याची घटना घडली आहे़ या प्रकरणी टिप्पर गँगच्या पठाण बंधूंविरोधात गुन्हा दाखल करण्यात आला आहे़   पोलिसांनी दिलेल्या माहितीनुसार महाराष्ट्र संघटित गुन्हेगारी कायदा अर्थात मोक्काच्या आरोपाखाली सिडकोतील टिप्पर गँगचा म्होरक्या समीर नासीर पठाण व त्याचा मोठा भाऊ शाकिर नासिर पठाण ऊर्फ मोठा पठाण हे नाशिकरोड मध्यवर्ती कारागृहात आहेत़ शनिवारी (दि़२१) सकाळी साडेदहा वाजेच्या सुमारास रेडिओचा चॅनल बदलण्याच्या कारणावरून समीर नासीर पठाण, शाकिर नासिर पठाण व बंदी तुकाराम गोडसे यांच्यात वाद होऊन हाणामारी झाली़  कैद्यांमध्ये वाद व हाणामारी सुरू झाल्याने कारागृहातील कर्मचारी शिपाई बिसमिल्ला शब्बीर तडवी व इतर सहकारी हा वाद सोडविण्यासाठी मध्ये पडले़ या कर्मचाऱ्यांना पठाण बंधूंनी शिवीगाळ व मारहाण केली़ या प्रकरणी पठाण बंधूंविरोधात नाशिकरोड पोलीस ठाण्यात गुन्हा दाखल करण्यात आला आहे़ (प्रतिनिधी)