नाशिकरोडला दुकानांवर दगडफेकीने धावपळ

नाशिकरोडच्या अनुराधा चौकापासून घोषणाबाजी करीत जाणाऱ्या काही युवकांनी दुकानदारास मारहाण केल्याची तक्रार आहे.

नाशिकरोड : नाशिकरोडच्या अनुराधा चौकापासून घोषणाबाजी करीत जाणाऱ्या काही युवकांनी दुकानदारास मारहाण केल्याची तक्रार आहे. तसेच टिळक पथवरील उघड्या जे. के. हार्डवेअर दुकानावर दगड फेकून काचा फोडण्यात आल्या़ तसेच रेजिमेंटल प्लाझा समोरील मिथिला इमारतीत एका दुकानाच्या बाहेरील शोच्या पुतळ्याची तोडफोड तसेच काच फोडून नुकसान केले. यानंतर प्रतीक आर्केडमधील उघड्या असलेल्या मल्हार गिफ्ट्स, देना बॅँक एटीएम, दिशा डायग्नोस्टीक यावर दगडफेक करून काचा फोडण्यात आल्या. नाशिक-पुणे महामार्गावरील चेहेडी शिव येथेही रास्ता रोको आंदोलन करण्यात आले़ त्यांनतर काही ज्येष्ठ कार्यकर्त्यांनी आंदोलनकर्त्यांना शांततेचे आवाहन करीत सर्वसामान्यांना वेठीस धरू नये असे आवाहन केल्याने शांतता निर्माण झाली.  सकल मराठा समाजाच्या वतीने पुकारण्यात आलेल्या नाशिक बंदला प्रतिसाद मिळाला. शहरात तसेच उपनगरांमध्येही कार्यकर्त्यांनी बंदमध्ये सहभागी होत आपल्या भावना व्यक्त केल्या. नाशिकरोडमधील किरकोळ अपवाद वगळता बंदला गालबोट लागले नाही. काही ठिकाणी रस्त्यांवर टायर जाळण्यात आले.