Nashik Municipal Election Result 2026 : महापौर निवडणुकीची रणनीती, महाजन नाशकात; नवनिर्वाचित नगरसेवक कोअर कमिटीची बैठक

Nashik Municipal Election Result 2026 And Girish Mahajan : भाजप नेते गिरीश महाजन नाशिकमध्ये दाखल झाले असून भाजपचे नवनिर्वाचित नगरसेवक आणि कोअर कमिटीचे ते बैठक घेणार आहेत.

नाशिक : भाजप नेते गिरीश महाजननाशिकमध्ये दाखल झाले असून, बुधवारी (दि.२१) भाजपचे नवनिर्वाचित नगरसेवक आणि कोअर कमिटीचे ते बैठक घेणार आहेत. पक्षातील निवडणूक काळातील आणि आता निकालानंतरचे वातावरण बघता महाजन काय भूमिका घेतात, याकडे लक्ष लागून आहे.

महाजन यांचे मंगळवारी (दि.२०) नाशिकमध्ये आगमन झाले. बुधवारी (दि.२१) सकाळी ११ वाजता जिल्हाधिकारी कार्यालयात ते बैठक घेतील किंवा एअर शोच्या नियोजित जागेची पाहणी करणार आहेत. त्यानंतर दुपारी १ वाजेच्या सुमारास वसंत स्मृति कार्यालयामध्ये सर्व नवनिर्वाचित नगरसेवक आणि पक्षाच्या कोअर कमिटीची बैठक ते घेणार आहेत. पक्षाला मिळाल्यानंत यशानंतर प्रथमच सर्वनगरसेवकांची बैठक होणार असून यात यशाबरोबरच पराभवाचाही परामर्श घेतला जाण्याची शक्यता आहे.

नाशिक महानगरपालिकेच्या निवडणुकीत भाजपला ७२ जागा मिळाल्या आहेत. दरम्यान, आता गुरुवारी (दि.२२) मुंबईत महापौर पदाची सोडत निघणार आहे. त्यात नाशिकसाठी कोणते आरक्षण निघते, या याकडे लक्ष लागून आहे. पक्षातील अनेक दावेदारांनी पदासाठी आतापासूनच व्यूहरचना सुरू केली आहे. कुंभमेळ्याच्या दृष्टीकोनातून महापौर पद महत्त्वाचे आहे. त्यामुळे गिरीश महाजन हे नव्या जुन्याचा कसा संगम घालतात, याकडे लक्ष लागून आहे.