नाशिक : आरोग्य विद्यापीठाशी संलग्न वैद्यकीय महाविद्यालय तसेच रुग्णालयाच्या बांधकामासाठी राज्य शासनाने परवानगी दिल्याने या कामाला लवकरच सुरुवात केली जाणार असल्याचे पालकमंत्री छगन भुजबळ यांनी सांगितले. दरम्यान, आरोग्य सुविधेसाठी विद्यापीठाने केंद्रालाही प्रस्ताव सादर करावा, अशी सूचना त्यांनी यावेळी केली.
जिल्हाधिकारी कार्यालयातील मध्यवर्ती सभागृहात महाराष्ट्र आरोग्य विज्ञान विद्यापीठाच्या वैद्यकीय महाविद्यालय रुग्णालयाची इमारत व महाराष्ट्र पदव्युत्तर वैद्यकीय शिक्षण व संशोधन संस्थेने केलेल्या कार्यवाहीचा आढावा घेण्यात आला. यावेळी जिल्हाधिकारी सूरज मांढरे, महानगरपालिका आयुक्त कैलास जाधव, आरोग्य विज्ञान विद्यापीठाचे कुलसचिव डॉ. कालिदास चव्हाण, सार्वजनिक बांधकाम विभागाचे अधीक्षक अभियंता एस. एन. राजभोज, ‘महावितरण’चे अधीक्षक अभियंता प्रवीण दरोली, कार्यकारी अभियंता सिद्धार्थ तांबे, आरोग्य उपसंचालक डॉ. पी. डी. गांडाळ, जिल्हा शल्यचिकित्सक डॉ. अशोक थोरात, जिल्हा आरोग्य अधिकारी डॉ. कपिल आहेर विद्यापीठाचे समन्वय डॉ. संदीप गुंडरे, आदी उपस्थित होते.
पालकमंत्री म्हणाले की, पुढील अनेक वर्षांचा विचार करून विद्यापीठाने वैद्यकीय महाविद्यालय व रुग्णालयाच्या इमारतीचे कामकाज प्राधान्याने पूर्ण करून आवश्यक तांत्रिक बाबीं व निधीची पूर्तता करावी. या प्रकल्पामुळे नाशिक जिल्ह्याच्या वैद्यकीय सुविधेत वाढ होणार असून या प्रकल्पासाठी आवश्यक असणारे सर्व सहकार्य शासनाच्यावतीने करण्यात येईल, अशी ग्वाही पालकमंत्री भुजबळ यांनी यावेळी दिली आहे.
सार्वजनिक बांधकाम विभागाने या इमारतीचे बांधकाम करताना अनुभवी तज्ज्ञ वास्तुविशारदाची नेमणूक करावी करून त्यांच्यामार्फत महाविद्यालय व रुग्णालयाच्या सोयी-सुविधांच्यादृष्टीने उत्कृष्ट आराखडा तयार होईल, असे नियोजन करावे. महाराष्ट्र पदव्युत्तर वैद्यकीय शिक्षण व संशोधन संस्थेच्या अभ्यासाक्रमांबाबत मराठा विद्याप्रसारक संस्थेसोबत करार करण्यात आला असून तसाच करार लवकरात लवकर जिल्हा सामान्य रुग्णालयाशी करण्यात यावा, असेही भुजबळ यांनी सांगितले.
दरम्यान, केंद्र सरकारमार्फत सर्व आरोग्य संस्थांना निधी उपलब्ध करून दिला जात असल्याने महाराष्ट्र आरोग्य विज्ञान विद्यापीठानेदेखील आपल्या स्तरावरून या प्रकल्पाच्या अनुषंगाने निधी उपलब्धीसाठी तत्काळ प्रस्ताव पाठविण्यात यावा, अशी सूचना संबंधित अधिकाऱ्यांना केली आहे.
कुलसचिव कालिदास चव्हाण यांनी यावेळी बैठकीत वैद्यकीय महाविद्यालय व रुग्णालयाच्या इमारतीबाबत करण्यात येणाऱ्या कार्यवाहीची माहिती सादर केली. पदव्युत्तर वैद्यकीय शिक्षणाबाबत जिल्हा सामान्य रुग्णालयाशीदेखील लवकरच करार करण्याबाबतची कार्यवाही करण्यात येणार असल्याची माहिती चव्हाण यांनी दिली.
---कोट--
महाराष्ट्र आरोग्य विज्ञान विद्यापीठाच्या अधिनस्त नवीन वैद्यकीय महाविद्यालय व त्यासोबतच रुग्णालय सुरु करण्यास शासनाने मान्यता दिली आहे. या वैद्यकीय महाविद्यालय व रुग्णालयामुळे जिल्ह्याच्या आरोग्य सुविधेत वाढ होणार आहे. याचा लाभ जिल्ह्याला व्हावा यासाठी इमारतीच्या कामाकाजाला गती दिली जाईल.
- छगन भुजबळ, पालकमंत्री