पतीच्या छळाला कंटाळून विवाहितेची आत्महत्या

सुकेणकर लेन परिसरात राहणाऱ्या एका २५ वर्षीय विवाहितेने पतीकडून होणाऱ्या वारंवारच्या छळाला कंटाळून राहत्या घरात गळफास घेऊन आत्महत्या

लोकमत न्यूज नेटवर्कपंचवटी : सुकेणकर लेन परिसरात राहणाऱ्या एका २५ वर्षीय विवाहितेने पतीकडून होणाऱ्या वारंवारच्या छळाला कंटाळून राहत्या घरात गळफास घेऊन आत्महत्या केल्याची घटना घडली आहे. याबाबत पंचवटी पोलीस ठाण्यात अकस्मात मृत्यूची नोंद करण्यात आल्याची माहिती पोलिसांनी दिली आहे. रविवार (दि.१८) दुपारी सुकेणकर लेन येथील वसंत अपार्टमेंट येथे राहणाऱ्या हर्षा प्रशांत जैन (२५) या विवाहितेने गळफास घेऊन आत्महत्या केल्याची घटना उघडकीस आली होती. विवाहितेला आत्महत्येस प्रवृत्त केल्याप्रकरणी मयत विवाहितेच्या वडिलांनी दिलेल्या तक्रारीनुसार पती प्रशांत जैन याच्याविरुद्ध गुन्हा दाखल करण्यात आला आहे. हर्षा हिचा विवाह तीन वर्षांपूर्वी पंचवटीतील जैन याच्याबरोबर झाला होता. त्यानंतर पती प्रशांत याने वारंवार चारित्र्याचा संशय घेत तसेच घरगुती कारणावरून वारंवार शारीरिक व मानसिक छळ सुरू केला होता. या छळाला कंटाळूनच तिने गळफास घेऊन आत्महत्या केल्याची तक्रार सुरेश छगन सैतवाल (रा. रावेर, जिल्हा जळगाव) यांनी पंचवटी पोलिसांत दिली आहे. आत्महत्या करण्यापूर्वी मयत जैन हिने एक चिठ्ठी लिहून ठेवली असल्याचे उघड झाले असून, चिठ्ठी जप्त केली आहे, अशी माहिती पंचवटी पोलिसांनी दिली आहे.