गेल्या आठवड्यात सामान्य रुग्णालयाच्या कार्य पध्दतीत सुधारणा करण्यासाठी राष्ट्रवादी काँग्रेसचे जिल्हाध्यक्ष तथा माजी आमदार आसिफ शेख यांनी रुग्णालयाला भेट दिली होती व रुग्णालय प्रशासनाला आठ दिवसांचा अल्टिमेटम दिला. मात्र यावेळी त्यांच्या समवेत कॉग्रेसचे सभागृह नेते असलम अन्सारी हेही सोबत होते. त्यामुळे चर्चेला उधाण आले आहे.
माजी आमदार शेख काँग्रेस पक्षात असतांना मनपाचे विद्यमान सभागृह नेते अन्सारी मोहंमद असलम व माजी नगरसेवक शकील अहमद जानी बेग हे दोघे खंदे समर्थक मानले जात. आसिफ शेख यांना गत विधानसभा निवडणुकीत पराभवाचा सामना करावा लागला. पराभवानंतरही पक्षश्रेष्ठींकडुन शेख यांना अपेक्षित प्रतिसाद मिळाला नसल्याने त्यामुळे व्यतीत होत शेख यांनी राष्ट्रवादी काँग्रेसची वाट धरली. त्यांच्यासोबत मनपाच्या निवडणुकीत पराभूत नगरसेवकांपैकी अनेकांनी राष्ट्रवादीत प्रवेश केला आहे. शेख यांच्या राष्ट्रवादी प्रवेशामुळे जवळपास दीड वर्षापासून रेंगाळलेला अध्यक्षपदाचा तिढाही सुटला आहे.
सामान्य रुग्णालय डॉक्टरांकडून प्रसूतीसाठी दाखल महिलांना उच्च रक्तदाब व विविध कारणास्तव धुळे येथे पाठविण्यात येत असल्याच्या तक्रारी प्राप्त झाल्याने आसिफ शेख यांनी शिष्टमंडळासह डॉ. हितेश महाले यांची भेट घेऊन चर्चा करीत यात सुधारणा करण्यासाठी आठ दिवसाचा अल्टिमेटम दिला. मात्र यावेळी शिष्टमंडळात माजी नगरसेवक शकील बेग, रफीक शेख व कार्यकर्त्यांसह कॉंग्रेसचे सभागृह नेते अन्सारी मोहंमद असलम हे उपस्थित होते. परिणामी मालेगाव मध्यच्या राजकारणात याची उलटसुलट चर्चा रंगू लागली आहे.
चौकट अन्सारींनीही वाचला पाढा
काँग्रेसचे मनपा विद्यमान सभागृह नेते तथा अन्सारी मोहंमद असलम व माजी नगरसेवक शकील बेग हे राष्ट्रवादी काँग्रेसचे मालेगाव जिल्हाध्यक्ष तथा माजी आमदार आसिफ शेख यांचे खंदे समर्थकच नसून यांच्यातील मैत्रीपूर्ण संबंध सर्वश्रुत आहेत. त्यामुळे मैत्रीपुढे पक्षाला काही काळ बाजूला सावरत शेख यांच्यासह अन्सारींनीही डॉ. हितेश महाले यांच्यासमोर तक्रारींचा पाढा वाचण्यापासून स्वतःला रोखू शकले नाही.