मालेगाव तालुक्यातील १२५ ग्रामपंचायतींच्या सरपंचपदाच्या आरक्षणाची कार्यवाही कोरोना विषाणूच्या प्रादुर्भावामुळे स्थगित ठेवण्यात आली होती. सरपंचपदाचे आरक्षण निश्चितीबाबत शासनाचे निर्देश प्राप्त झाल्यामुळे मालेगाव तालुक्यातील १२५ ग्रामपंचायतीतील सरपंच पदाचे आरक्षण सोमवार, दि. १४ डिसेंबर रोजी काढण्यात येणार असल्याची माहिती तहसीलदार चंद्रजीत राजपूत यांनी दिली आहे.
मालेगाव तालुक्यातील अनुसूचित क्षेत्राबाहेरील ग्रामपंचायत सरपंचपद सुधारित आरक्षण १ एप्रिल २०२० ते ३१ मार्च २०२५ असून, तालुक्यातील अनुसूचित क्षेत्राबाहेरील ग्रामपंचायतीची संख्या १२५ आहे. अनुसूचित जातीसाठी आरक्षित सरपंचपदांची संख्या सात, तर अनुसूचित जमातीसाठी आरक्षित सरपंच पदे २०, मागास प्रवर्ग नागरिकासाठी आरक्षित सरपंचपदे एकूण ३४ व सर्वसाधारण सरपंचपदे ६४ आहेत.