----------
झाडावर दुचाकी आदळून एक ठार
पंचवटी : मखमलाबाद-मातोरी रस्त्यात असलेल्या झाडावर दुचाकी आदळून मातोरी येथील शरद चंदर गांगुर्डे (३५) हा युवक ठार झाला, तर दुचाकीवर बसलेला अन्य एक जण जखमी झाला आहे. गुरुवारी रात्री साडेदहा वाजेच्या सुमारास हा अपघात घडला. या अपघाताबाबत मातोरी येथे राहणाऱ्या सागर लिलके यांनी म्हसरूळ पोलीस ठाण्यात तक्रार दाखल केली आहे.
मातोरी येथे राहणारे शरद गांगुर्डे व रामचंद्र भानुदास तांदळे असे दोघेजण रात्री साडेदहा वाजेच्या सुमारास दुचाकीवरून मखमलाबादकडून मातोरी गाव रस्त्याने जात असताना दुचाकीचे नियंत्रण सुटल्याने दुचाकी रस्त्याच्या डाव्या बाजूला असलेल्या झाडावर आदळली. या घटनेत गांगुर्डे व तांदळे असे दोघे जण जखमी झाले त्यात गांगुर्डे यांचा मृत्यू झाला.
--------
महिलेची ५ तोळ्याची सोनसाखळी ओरबाडली
पंचवटी : नवी मुंबई येथून आडगाव शिवारातील टाकळी रोडवर असलेल्या एका लॉन्सला नातेवाइकाच्या विवाह सोहळ्याला आलेल्या महिलेच्या गळ्यातील सव्वा लाख रुपये किमतीची पाच तोळे वजनाची सोनसाखळी काळ्या रंगाच्या दुचाकीवरून आलेल्या दोघा भामट्यांनी ओरडून नेल्याची घटना रात्री पावणेअकरा वाजेच्या सुमारास घडली आहे. याबाबत आडगाव पोलीस ठाण्यात दोघा सोनसाखळी चोरांविरुद्ध जबरी लूट केल्याचा गुन्हा दाखल करण्यात आला आहे.