वावी परिसरात कहांडळवाडी येथे अज्ञात चोरट्यांनी मध्यरात्रीच्या सुमारास धाडसी चोरी केली. या घटनेमुळे परिसरातील भीतीचे वातावरण निर्माण झाले आहे. येथील रहिवासी भास्कर तुकाराम कहांडळ हे आपल्या राहत्या घरी झोपेत असताना मध्यरात्री सुमारास अज्ञात चोरट्यांनी पाठीमागच्या बाजूने घरात प्रवेश केला. बेडरूममधील सामान, कपाटातील असलेले जवळपास साडेतीन तोळे सोने लंपास केले. त्याचबरोबर भास्कर कहांडळ यांच्याकडील खिशात असलेले सात हजार रुपये व त्यांच्या पत्नी यांच्या पर्समध्ये असलेले अडीच हजार रुपये असा मुद्देमाल या चोरट्यांनी लंपास केला. सदर घटना ही सकाळी उठल्यानंतर कहांडळ यांच्या पत्नी यांच्या लक्षात आली. मागील दरवाजाची कडी वाकवून चोरट्यांनी प्रवेश केला. सकाळी उठल्यानंतर घरातील बेडरूममधील सर्व सामान अस्ताव्यस्त पाहून कहांडळ यांच्या पत्नीने कपाटातील दागिन्यांचा बॉक्स चेक केला असता त्यातील सर्व दागिने या चोरट्यांनी चोरून नेल्याचे निष्पन्न झाले आहे. अशा परिस्थितीत भास्कर कहांडळ यांनी पोलीस ठाण्यात खबर देऊन सदर घटना कळविली. त्यावर वावी पोलीस ठाण्याच्या कर्मचाऱ्यांनी तत्काळ घटनास्थळी भेट देऊन घटनेचा पंचनामा केला. यावेळी सहायक पोलीस निरीक्षक सागर कोते यांच्या मार्गदर्शनाखाली पोलीस हवालदार प्रकाश गवळी, दशरथ मोरे, नितीन जगताप, प्रकाश उंबरकर अधिक तपास करीत आहेत.
फोटो ओळी- सिन्नर तालुक्यातील कहांडळवाडी येथे अज्ञात चोरट्यांनी चोरी करून कपाटातील साहित्य अस्ताव्यस्त केले.