-------------------
लसीकरण मोहीम ऑफलाइन करण्याची मागणी
नांदूरशिंगोटे : कोरोनावरील लस घेण्यासाठी ऑनलाइन नोंदणी बंधनकारक करण्यात आली आहे. मात्र काही नागरिकांना ऑनलाइन नोंदणी करता येत नाही. तसेच ग्रामीण भागात अनेक जणांकडे मोबाइल नसल्याने त्यांना ऑनलाइन नोंदणी करता येत नाही. त्यामुळे लसीकरण मोहीम ऑफलाइन करावी, अशी मागणी ग्रामीण भागातून होत असल्याचे चित्र आहे.
------------------
लॉकडाऊनमुळे कांदा चाळीत
नांदूरशिंगोटे : कोरोनाच्या पार्श्वभूमीवर बाजार समित्या बंद आहेत. त्यामुळे कांदा चाळीत टाकण्यावर शेतकऱ्यांनी भर दिला आहेत. यंदा मान्सून वेळेवर दाखल होणार असल्याचा अंदाज हवामान खात्याने व्यक्त केल्याने कांदा चाळीत टाकण्यासाठी शेतकऱ्यांची धावपळ सुरू आहे. तसेच कांद्याचे भाव घसरल्याने बळीराजा संकटात सापडला आहे.
----------------
मऱ्हळला कोरोना प्रतिबंधक लस
नांदूरशिंगोटे : मऱ्हळ खुर्द येथे पहिल्या टप्प्यात ४५ वर्ष वयाच्या पुढील १०० नागरिकांना लसीकरण करण्यात आले. ज्येष्ठ, दुर्धर आजाराने पीडित असलेल्यांना लसीकरणात प्राधान्य देण्यात आले. ग्रामपंचायतीच्या पुढाकारातून वावी प्राथमिक आरोग्य केंद्रांतर्गत मऱ्हळ उपकेंद्राद्वारे कोरोना प्रतिबंधक लसीकरण करण्यात आले. येथील जिल्हा परिषदेच्या प्राथमिक शाळेत सरपंच सुजाता शिवाजी घुगे यांच्या हस्ते लसीकरण मोहिमेचा शुभारंभ करण्यात आला.
-----------------
चेक पोस्टवर वाहनांची तपासणी
नांदूरशिंगोटे : राज्य शासनाच्या जिल्हाबंदी आदेशान्वये नांदूरशिंगोटे येथील नाशिक-पुणे महामार्गावर चेक पोस्ट उभारण्यात आला असून, प्रत्येक वाहनाची चौकशी करण्यात येत आहे. जिल्हा हद्दीवर चेक पोस्ट उभारण्यात आला आहे. कोरोना विषाणूचा प्रादुर्भाव वाढत असल्याने राज्य शासनाने जिल्हाबंदीचे आदेश जाहीर केले आहे. पोलीस कर्मचारी, शिक्षक, होमगार्ड आदींची नियुक्ती करण्यात आली आहे.