---
औरंगाबाद रोडवरील हॉटेलमधून मद्यसाठा जप्त
पंचवटी : औरंगाबाद रोडवरील हॉटेल दख्खन करी येथे गुन्हे शाखेच्या युनिट एकच्या पथकाने छापा टाकत विनापरवाना बाळगलेला २० हजारांचा अवैध मद्यसाठा जप्त केला आहे.
जयशंकर लॉन्ससमोरील हॉटेल दख्खन करी येथे ग्राहकांना विनापरवाना मद्य विक्री केली जात असल्याची माहिती पोलिसांना मिळाली होती. त्यानुसार गुन्हे शाखा युनिट एकच्या पथकाने मंगळवारी दुपारी छापा टाकला. या छाप्यात व्हिस्की, रम, वाईन तसेच बियर असा २० हजारांचा मद्यसाठा आढळून आला. याप्रकरणी हॉटेलचालक धनंजय विनोद पाण्डेय याच्याविरुद्ध आडगाव पोलिसांत दारूबंदी अधिनियम कलमान्वये गुन्हा दाखल करण्यात आला आहे.
---
गांजा तस्करीप्रकरणी संशयितास अटक
पंचवटी : आडगाव शिवारातील नववा मैल परिसरात इनोव्हा मोटारीत आढळलेल्या बेकायदेशीर ६० किलो गांजाच्या तस्करीप्रकरणी आडगाव पोलिसांनी येवला येथून अझरुद्दीन परवेझ शेख यासह अजून एका संशयितास बेड्या ठोकल्या आहेत. काही दिवसांपूर्वीच मालेगावच्या नदीम आरिफ कलिम अहमद याला अटक केली होती. सध्या तो पोलीस कोठडीत आहे. येवल्यातील संशयित शेख हा नाशिकमध्ये आल्याची माहिती मिळताच पोलिसांनी त्याला दोन दिवसांपूर्वी अटक करून न्यायालयात हजर केले असता त्याला तीन दिवस पोलीस कोठडी सुनावली आहे.