नाशिक : सार्वजनिक वाचनालयाच्या कार्यकारी मंडळाच्या निवडीची सभा पार पडली. या सभेत सावाना कार्याध्यक्षपदी संजय करंजकर यांची निवड करण्यात आली असून प्रमुख सचिवपदी जयप्रकाश जातेगावकर यांची निवड करण्यात आली आहे. सावाना अध्यक्ष प्रा. विलास औरंगाबादकर यांच्या अध्यक्षतेखाली ही निवड ऑनलाईन पद्धतीने करण्यात आली.
कोरोनाच्या पार्श्वभूमीवर शासनाच्या निर्देशानुसार कोणत्याही सांस्कृतिक कार्यक्रमांच्या सभा, बैठका घेता येणार नसल्याने ही सभादेखील ऑनलाईन पद्धतीने पार पडली. ऑनलाईन सभेस सावानाचे सर्व पदाधिकारी उपस्थित होते. या निवड समितीमध्ये उदयकुमार मुंगी यांची अर्थसचिवपदी तर सहायक सचिवपदी डॉ. शंकर बोऱ्हाडे आणि ग्रंथ सचिव पदावर देवदत्त जोशी यांची निवड करण्यात आली आहे. सावानाच्या सांस्कृतिक कार्य सचिव म्हणून प्रा. डाॅ. वेदश्री थिगळे यांची तर नाट्यगृह सचिव म्हणून ॲड. अभिजीत बगदे यांची तर वस्तुसंग्रहालय सचिव म्हणून बी. जी. वाघ यांची नियुक्ती करण्यात आली आहे. मंडळातील पदाधिकाऱ्यांची निवड एकमताने करण्यात आली. या निवड झालेल्या पदाधिकाऱ्यांना वसंत खैरनार, श्रीकांत बेणी, ॲड. भानुदास शौचे, डॉ. धर्माजी बोडके, गिरीश नातू, प्रा. संगीता बाफना यांनी पुढील कार्यकाळासाठी शुभेच्छा दिल्या.
फोटो
३१करंजकर
३१जातेगावकर