मालेगाव : चीनमध्ये कोरोना धुमाकूळ घालत असताना, चीनमधील वुहानमध्ये एमबीबीएसचे शिक्षण घेत असलेला तरुण मालेगावी परतला आणि शहरात एकच घबराट पसरली. आरोग्य विभागाची एकच धावपळ झाली. रोज पथकाने त्याची तपासणी केली, परंतु तो ‘निगेटिव्ह’ निघाल्याने सर्वांनी सुटकेचा नि:श्वास सोडला, परंतु एप्रिलच्या पहिल्या आठवड्यात कोरोनाने मालेगाव गाठलेच आणि मालेगाव राज्यात हॉटस्पॉट ठरले.
८ एप्रिल रोजी मालेगावात कोरोनाने पहिला बळी घेतला. यामुळे नागरिकांत प्रचंड दहशत पसरली. आरोग्य विभागही सतर्क झाला. त्या पाठोपाठ चार जण बाधित मिळून आले आणि तेथूनच शहरात ‘कोरोना’ची मालिका सुरू झाली. कोरोनामुळे बळींची संख्याही वाढू लागल्याने, मालेगाव हॉटस्पॉट ठरले. साहजिकच राज्य शासनाचेही लक्ष वेधले गेले. शहराची अवस्था वाळीत टाकण्यासारखी झाली. कुणी मालेगावी येईना अन्‌ कुणाला बाहेरगावी जाऊ देईना. ‘लॉकडाऊन’मुळे सर्व रुग्णालये बंद होती. बाधितांची जसजशी रुग्णसंख्या वाढू लागली, तसतशी त्यांना उपचारार्थ ठेवण्यासाठी जागेची गरज भासू लागली. प्रारंभी जीवन हॉस्पिटलमध्ये उपचार सुरू झाले. मात्र, शहरापासून दूर असल्याने नागरिकांची नाराजी लक्षात घेऊन शहरातच सहारा हॉस्पिटल मन्सुरा आणि मसगा महाविद्यालय उपचार सुरू झाले. फारान हॉस्पिटल, हज हाउस, दिलावर हॉल अधिग्रहीत करण्यात आले. आयएचडीपीमधील पाच इमारतींमध्ये रुग्ण ठेवण्यात आले. राज्य शासनाची मदत, आरोग्य विभागाची मेहनत, यामुळे अल्पावधीतच ‘कोरोना’वर नियंत्रण मिळविण्यात प्रशासनाला यश आले आणि राज्यभरातून बाधित उपचारार्थ येऊ लागले. आज कोरोनाबाधितांचा मृत्युदर घटला आहे. मात्र, याच काळात मार्च-एप्रिल महिन्यात मोठ्या संख्येने ‘कोरोना’ने बळी घेतले होते. मात्र, मालेगावी आरोग्य विभागाने घेतलेल्या मेहनतीने त्यावर नियंत्रण मिळविले. दरम्यान, ‘मन्सुरा’ हॉस्पिटलच्या काढ्याची चर्चाही बरीच रंगली. मालेगावात महापालिका क्षेत्रात आतापर्यंत १७४ जणांचा कोरोनाने बळी घेतले आहेत. आज शहरात रिकव्हरी रेट ९२.८२ टक्क्यांवर आला आहे. मालेगाव मनपा क्षेत्रातील १४८ बाधितांवर उपचार सुरू आहेत. सुमारे ४३ रुग्णसंख्येपर्यंत आरोग्य विभागाने नियंत्रण मिळविलेल्या कोरोनाचे आज मात्र १४८ रुग्ण उपचार घेत आहेत. मालेगावी आतापर्यंत एकूण ४ हजार ५४६ कोरोनाबाधित रूग्ण आढळून आले. त्यातून ४ हजार २२४ रुग्ण बरे झाले आहेत. १७४ जणांना आपला जीव गमवावा लागला. सध्या १४८ जण उपचार घेत असून, रिकव्हरी रेट ९२.९२ टक्के इतका आज आहे. कोरोनाचे संशयित २६ हजार ५४४ रुग्ण तपासणीत ‘निगेटिव्ह’आले आहेत.
मालेगावी महापालिकेने विकास कामांसाठीचा निधी ‘कोरोना’वर खर्च केल्याने अनेक विकास कामे रखडली. मालेगावी नवीन बसस्थानकाजवळ सुरू असलेल्या उड्डाण पुलाचे काम रेंगाळलेले काम या वर्षी पूर्ण होण्याची शक्यता आहे.