पंचवटी : रविवारी सायंकाळी मान्सूनपूर्व पावसाने वादळी वाऱ्यासह हजेरी लावल्याने दिंडोरी रोडवरील महालक्ष्मी सिनेमामागे असलेल्या श्रीरामनगर येथे गुलमोहर वृक्ष एका चारचाकीवर कोसळल्याने चारचाकी वाहनाच्या काचा फुटल्या तसेच वाहनाचा मागील भाग चेपला गेला.
गुलमोहर वृक्ष बुंध्यापासून कोसळून उद्यानाबाहेर उभ्या असलेल्या कारवर (एम. एच. ०४, डिजे ३७९४) झाडाची फांदी पडल्याने गाडीच्या काचा फुटून मागचा भाग चेपला गेला. पंचवटी अग्निशमन दलाच्या जवानांनी तत्काळ घटनास्थळी धाव घेत झाडाच्या फांद्या कटरने कापून फांदी रस्त्यातून बाजू केली. घटनेत कोणत्याही प्रकारची जीवितहानी झाली नाही असे अग्निशमन दलाच्यावतीने सांगण्यात आले.
पावसामुळे तो वृक्ष बुंध्यापासून भिजला गेल्याने उन्मळून पडला. वृक्ष रस्त्यावर पडल्याने काहीकाळ मुख्य कॉलनी रस्त्यावरची वाहतूक बंद झाली होती. या घटनेत कोणत्याही प्रकारची जीवितहानी झाली नाही. मात्र, वाहनावर तसेच मनपा उद्यानाच्या संरक्षण जाळीवर झाडाची मोठी फांदी पडल्याने चारचाकी वाहनाचे आणि संरक्षित जाळीचे नुकसान झाले.