गंगापूर धरण ९१ टक्के

गंगापूर धरणाचे विधिवत पूजन

नाशिक : शहराला पाणीपुरवठा करणारे गंगापूर धरण ९१ टक्के भरल्याने शनिवारी (दि.३०) सकाळी महापौर अ‍ॅड. यतिन वाघ यांच्यासह सर्व प्रमुख विरोधी गटनेते यांच्या उपस्थितीत गंगापूर धरणाचे विधिवत पूजन करण्यात आले. त्याचवेळी बहुचर्चित दोन वेळा पाणीपुरवठ्याचाही प्रश्न निकाली निघून महापौरांनी रविवारपासून (दि.३१) शहरात पूर्वीप्रमाणेच दोन वेळा पाणीपुरवठा करण्यात येणार असल्याची माहिती माध्यमांना दिली.शहरात पुरेसा पाऊस न झाल्याने गंगापूर धरणातील पाणीसाठा अत्यल्प राहिल्याने जून महिन्यानंतर शहरात एकवेळ पाणीपुरवठा करण्यात येत होता. मात्र जुलैच्या शेवटी व आॅगस्टमध्ये जोरदार पाऊस झाल्याने गंगापूर धरणाचा पाणीसाठा ९१ टक्के भरला. त्यामुळे शहरात दोन वेळा पाणीपुरवठा करण्याबाबत महापालिकेतील राजकारण तापले होते. त्यातच मनसेतील अंतर्गत संघर्षामुळे स्थायी समिती सभापती अ‍ॅड. राहुल ढिकले यांनी दोन वेळा पाणीपुरवठा करण्याची सूचना अधिकाऱ्यांना केली होती. महापौर अ‍ॅड. यतिन वाघ यांनी मात्र पाणीसाठ्याचा आढावा घेऊन त्यानंतरच दोन वेळा पाणीपुरवठ्याबाबत निर्णय घेण्यात येईल, असे जाहीर केले होते. त्यातच शनिवारी सकाळी गंगापूर धरण भरल्याचे निमित्त साधून महापौरांच्या हस्ते विधिवत गंगापूर धरणाचे पूजन करण्यात आले. उपमहापौर सतीश कुलकर्णी, स्थायी समिती सभापती अ‍ॅड. राहुल ढिकले. विरोधी गटनेता सुधाकर बडगुजर, मनसेचे गटनेता अशोक सातभाई, संभाजी मोरूस्कर, शिवाजी गांगुर्डे, उद्धव निमसे, अजय बोरस्ते, विलास शिंदे, देवयानी फरांदे, सुवर्णा मटाले, यशवंत निकुळे, सलीम शेख, सतीश सोनवणे, गुरुमित बग्गा, दामोदर मानकर, शशिकांत जाधव, अशोक मुर्तडक, रत्नमाला राणे, शोभा आवारे, सुरेखा नागरे, कविता कर्डक, रमेश धोंगडे, उपआयुक्त हरिभाऊ फडोळ आदि उपस्थित होते. (प्रतिनिधी)